O deputado Efrén Castro inaugura en Sarria a mostra “Galiza. Un pobo, unha selección”, dispoñible no Chanto ata o vindeiro 3 de marzo
O deputado de Deportes, Efrén Castro, inaugurou en Sarria a mostra “Galiza. Un pobo, unha selección”, organizada por Vía Galega coa colaboración da Vicepresidencia da Deputación de Lugo. A exposición, ubicada no Chanto, a carón da piscina cuberta da localidade, poderá visitarse ata o próximo 3 de marzo, sendo Sarria o primeiro dos destinos nos que se presentará nos vindeiros meses ao longo da provincia.
A exposición, que consta de 20 paneis insertados en estruturas metálicas deseñadas para exterior, repasa a historia do deporte galego, afondando na participación de deportistas do país nos Xogos Olímpicos, na traxectoria das seleccións galegas e na mobilización social arredor do dereito de Galiza a participar con equipos propios en competicións internacionais.
No acto de inauguración, no que tamén estivo presente o concelleiro de Deportes de Sarria, Félix Seijas, o deputado Efrén Castro subliñou “a importancia de que este proxecto se difunda por distintos puntos da provincia, e que a xente poda atopar un anaco da historia do noso deporte na rúa”. Ademais, aproveitou para agradecer a boa acollida e desexou “que sexan moitas as persoas que se interesen polo contido destes paneis para divulgar o papel fundamental do deporte galego”.
“Galiza. Un pobo, unha selección” está estruturada en diferentes bloques temáticos. O primeiro deles, centrado no dereito a competir, repasa a loita a prol das seleccións deportivas galegas, o peso de Seareiros Galegos desde o seu nacemento nos 90 e a situación de Galiza no mundo deporte, sen representación, en contraposición co que sucede con outras nacións sen Estado que si compiten internacionalmente como Escocia ou Gales.
A selección galega de fútbol é a protagonista do segundo bloque temático, no que se repasa a súa traxectoria desde que disputara o primeiro partido, en 1922 en Vigo ata o día de hoxe, e no que se glosa os logros dos mellores equipos e xogadores do pais, desde o Balón de Ouro Luís Suárez ata Iago Aspas.
O fútbol gaélico tamén protagoniza un dos paneis expositivos, por ser o único deporte no que Galiza compite oficial e internacionalmente propia. Tamén contan con espazo na exposición outros deportes minoritarios nos que Galiza acumula exitos ecomo o squash, o boseo, o taekwondo, a loita libre, o tiro con arco ou o xadrez.
A mostra inclúe tamén un panel que repasa o desempeño de deportistas de Galiza nos Xogos Olímpicos e Paralímpicos, desde os Xogos de Amberes en 1920.
A muller e a súa loita pola igualdade tamén contan co seu propio bloque temático, con lendas do pasado como Irene Basanta ou Xulia Vaquero e representantes do presente como Raquel Carrera, Belén Toimil, Ana Peleteiro ou Julia Benedetti.
O triatlón, os deportes acuáticos ou o ciclismo contan tamén con cadanseu bloque temático. Os deportes tradicionais tamén teñen o seu espazo con paneis nos que se bota luz sobre disciplinas propias de Galiza como a bilarda, a chave, a loita galega ou os bolos celtas.
Por último, a exposición tamén afonda na calidade do deporte e deportistas de Lugo, nas disciplinas máis descoñecidas e minoritarias e no mundo do motor.
Itinerancia
Tras a súa exposición na Praza de San Marcos, a mostra iniciará un percorrido polas distintas comarcas. Nos vindeiros meses, poderase ver en Sarria, Monforte, Chantada, Vilalba, Viveiro, Foz, Ribadeo, Barreiros e Valadouro.
Campaña a prol das seleccións galegas
A mostra forma parte dunha campaña en favor das seleccións deportivas galegas que está a desenvolver a plataforma Vía Galega, que integra máis de 60 colectivos sociais, culturais e deportivos. Ademais da propia exposición, q campaña inclúe a edición de publicacións divulgativas, videos promocionais e palestras en diferentes localidades de Galiza.
