A Deputación inaugura mañá unha exposición fotográfica sobre o entroido de Val de Francos, en Castro de Rei
![](/sites/deputacionlugo.org/files/2022-03/Foto%20arquivo%20Entroido%20Val%20de%20Francos.jpeg)
A Deputación de Lugo inaugurará este xoves ás 19:30 horas no Pazo de San Marcos unha exposición fotográfica que pon en valor o entroido de Val de Francos, en Castro de Rei, facendo un percorrido pola historia desta cita, que foi recuperada hai 30 anos nas parroquias que forman Val de Francos: Ansemar, Balmonte e Goberno. A mostra está promovida pola asociación do Val de Francos da localidade, co apoio e financiamento da institución provincial.
A exposición contará con arredor de 300 fotografías que, durante unha semana –dende mañá e ata o 6 de abril- poderá ser visitada nos corredores da sede provincial.
O acto de inauguración complementarase coa conferencia Entroidos Galegos e Mascarada Europea, que ofrecerá Óscar J. González e na que realizará unha comparativa entre esta cita castrexa con entroidos da provincia, como o Oso de Salcedo, na Pobra do Brollón, ou o entroido Ribeirao, ademais doutras citas de Galicia e España.
O entroido do Val de Francos, organizado pola asociación do Val de Francos, foi estudado por González, etnógrafo e investigador especializado en Mascaradas europeas e autor do libro Mascaradas de la Península Ibérica.