A Deputación mellorará con 137.000€ a estrada provincial que conecta Navia de Suarna e Cervantes
Este proxecto beneficiará de maneira directa a moitos veciños e veciñas da comarca que transitan a diario por esta vía
A Deputación de Lugo mellorará a estrada provincial LU-P-3505 que conecta a localidade de Navia de Suarna coa parroquia de Donís, no concello de Cervantes, cun investimento de preto de 137.000€. O proxecto inclúe a renovación de practicamente o conxunto da vía, actuando en preto de 26 quilómetros dos 28 totais.
Os traballos consistirán no acondicionamento e a repavimentación da vía e actuarase no treito comprendido entre os quilómetros 0,970 e o 26,654. O prazo de execución é de 3 meses.
A Xunta de Goberno provincial acaba de aprobar a adxudicación dos traballos á empresa Construcciones Leonardo Miguélez SL. Uns arranxos na vía que beneficiarán a numerosos veciños e veciñas da comarca da Montaña que utilizan a diario esta estrada.
O Presidente da Deputación de Lugo, José Tomé Roca, salienta a importancia desta actuación e recalca que “a mellora das comunicacións é unha prioridade para o Goberno”. Detalla, así mesmo, que “defendemos a mobilidade como un dereito básico dos veciños e veciñas da provincia porque cremos que unha boa rede de estradas é fundamental para o equilibrio territorial e para o desenvolvemento do rural, porque axuda a fixar poboación e a achegar os servizos”.
A institución provincial destina 17,3M€ dos seus Orzamentos para o 2022 ás tarefas de mellora do firme, roza de maleza, conservación e mantemento da rede viaria provincial, a máis extensa de todo o Estado e tres veces maior ca da Xunta en Lugo.
