A Deputación repara a parte plana do tellado do Pazo de San Marcos
A Deputación de Lugo iniciou esta semana as obras para a reposición da lámina impermeabilizante da parte plana do tellado de San Marcos deteriorada polo paso do tempo. Está previsto que esta actuación, que conta cun orzamento de preto de 20.000€, finalice xa a semana que vén coa reinstalación dos equipos de climatización que se retiraron para poder actuar nesta zona do edificio provincial.
Estas obras súmanse ás que xa acometeu a institución na cuberta de San Marcos hai menos de dous anos cun investimento de 345.000€.
A actuación forma parte das diferentes accións que o Goberno provincial está a levar a cabo para mellorar e poñer en valor o Pazo de San Marcos, un dos bens patrimoniais emblemáticos da provincia. Neste sentido, a Deputación vén de iniciar o proceso para a contratar obras de reparación e acondicionamento da fachada deste edificio por importe de 120.000€. Uns traballos cos que se pretende solucionar os problemas de deterioro da fronte do Pazo provocados polo paso do tempo e que inclúen a limpeza da fachada e da súa mampostería, o saneamento de fisuras e gretas, a eliminación de humidades e de filtracións de auga e o pintado das paredes; tamén a colocación na fachada dunhas letras en aceiro pintado co texto Deputación Provincial de Lugo, que xa existían antes da remodelación da Praza de San Marcos.
