O Presidente da Deputación participa na visita do Rei Filipe VI a Lugo con motivo do Tour do Talento
![](/sites/deputacionlugo.org/files/2023-05/050523%20Asistencia%20do%20Presidente%20ao%20acto%20central%20do%20Tour%20do%20Talento%20de%20Lugo.jpg)
O Presidente da Deputación de Lugo, José Tomé Roca, participou este venres na visita institucional que realizou o Rei Filipe VI a Lugo, a primeira á capital lucense que realizou como monarca, con motivo do Tour do Talento, unha iniciativa impulsada pola Fundación Princesa de Girona en colaboración co Concello de Lugo. Esta é a segunda visita do monarca á provincia, pois o pasado ano estivo en Sarria.
José Tomé Roca acompañou ao Xefe do Estado no acto central do Tour do Talento na capital lucense, no que se proclamou o gañador do Premio Fundación Princesa de Girona 2023 na categoría de Investigación Científica. Este evento incluíu durante toda esta semana 50 actividades en Lugo para impulsar e poñer en contacto o talento da mocidade da provincia. Durante a visita, percorreron a Feira do Talento, na que puideron ver algúns dos vehículos e pezas deseñados e construídos polo estudantado do Centro Integral de Formación Profesional As Mercedes.
No acto estiveron presentes a Alcaldesa de Lugo, Lara Méndez, a Ministra de Xustiza, Pilar Llop, o delegado do Goberno en Galicia, José Ramón Gómez Besteiro, e o Presidente da Xunta, Alfonso Rueda, así como outras autoridades institucionais e representantes da Fundación Princesa de Girona.
Tour do Talento
A Deputación de Lugo participou o martes na primeira xornada do Tour do Talento. Foi o Deputado de Promoción Económica e Social, Pablo Rivera Capón, o encargado de expoñer o programa Reiníciate, que impulsa a institución provincial en colaboración coa Escola de Organización Industrial (EOI), dependente do Ministerio de Industria, Comercio e Turismo, para favorecer a transformación dixital das pemes e autónomos da provincia, e para fomentar a empregabilidade dos mozos e mozas, e dos parados de longa duración.