O Presidente felicita a Ángel Tomé pola súa reelección como secretario xeral de UGT Lugo

O Presidente da Deputación de Lugo, José Tomé Roca, felicitou este xoves a Ángel Tomé pola súa reelección como secretario xeral  de UGT Lugo na clausura do III Congreso UGT-Lugo, Lemos e Costa Lucense celebrado no hotel Torre de Núñez. “Con este novo mandato estou seguro de que seguirás sendo un referente imprescindible para os traballadores e traballadoras da provincia”, sinalou o mandatario provincial no acto, no que participou tamén o Secretario Xeral de UGT en Galicia, Cristobal Medeiros.

Tomé Roca destacou de Ángel Tomé, que leva desde o 2011 á fronte de UGT Lugo, que o seu traballo “incansable” e a súa dedicación “son un exemplo do que significa o sindicalismo con maiúsculas: estar ao carón da clase traballadora, loitar polas súas reivindicacións e ser unha voz firme ante calquera inxustiza”.

“UGT non é só un sindicato, é un instrumento de transformación social, unha ferramenta que durante décadas ten sido clave para lograr avances fundamentais no mundo laboral”, valorou o Presidente da Deputación. Sinalou os grandes desafíos dos tempos actuais: “a necesidade de garantir empregos estables e de calidade, a loita contra a precariedade, a mellora das condicións salariais e laborais e a defensa dos dereitos sociais fronte a quen os poñen en dúbida”.

Destacou que nos últimos anos a acción sindical, en colaboración co Goberno, foi capaz de impulsar cambios históricos como a reforma laboral que reduciu a temporalidade, as subas do salario mínimo, ou os ERTES que protexeron postos de traballo en tempos de crise. “UGT é memoria, pero sobre todo, é futuro. Un futuro que debemos seguir construíndo con forza e determinación, sabendo que cada dereito conquistado foi froito da loita e do esforzo conxunto. Porque a dignidade laboral non se regatea, deféndese”.