A Deputación participa na XXIX Festa do Queixo San Simón da Costa de Vilalba
O Deputado de Promoción Económica e Social, Pablo Rivera Capón, asistiu este sábado na Praza da Constitución de Vilalba ao pregón da XXIX Festa do Queixo de San Simón da Costa que ofreceu o actor Carlos Blanco. A continuación, tivo lugar a entrega de premios da ruta BTT San Simón da Costa, que contou cunha colaboración de 3.000€ euros da institución provincial. Neste evento, que se celebra durante a fin de semana, o Deputado provincial estivo acompañado da Alcaldesa de Vilalba, Marta Rouco Seoane, e a Subdelegada do Goberno en Lugo, Isabel Rodríguez López, entre outras autoridades.
Rivera Capón destacou que “Vilalba é exemplo de como un concello pode facer medrar unha festa sen perder a súa esencia”. Neste sentido, puxo en valor o esforzo da Alcaldesa “por liderar un equipo que aposta pola calidade, pola cultura e por seguir ampliando horizontes. Este ano, a programación sobe o listón, con propostas que nos enchen de orgullo como Fillas de Cassandra ou De Ninghures”.
A programación deste sábado tamén incluíu unha cata de queixo, actuacións musicais ou un obradoiro de cociña infantil, entre outras actividades. O domingo a feira abrirase a partir das 10:00 horas, a Banda de Gaitas Mato Vizoso actuará ás 12:30 horas e a festa rematará ás 17:00 horas no Centro Cultural e Recreativo do municipio cunha xornada de baile.
