Medio Rural da Deputación promove o debate sobre alternativas ao uso do petróleo no sector primario co apoio a unhas xornadas celebradas no Muvicla
Medio Rural da Deputación de Lugo colaborou na segunda edición das “Xornadas sobre alternativas ao uso do petróleo en aplicacións agrícolas”, que se desenvolveu o pasado 2 de novembro no Museo vivo e integrado do campo e da locomoción agraria (MUVICLA), en Láncara.
Unha temática de máxima actualidade e interese para o sector primario polos prezos que están alcanzando o gasóleo agrícola, os plásticos e os fertilizantes e polas perspectivas de esgotamento dun recurso non renovable como é o petróleo.
Ao longo da xornada, profesionais e investigadores especializados analizaron os novos horizontes a nivel enerxético na agricultura. As ponencias centrais correron a cargo de Xosé Ramón Doldán García, profesor de Economía Aplicada da Universidade de Santiago de Compostela e ex-director do Instituto Enerxético de Galicia (Inega), que falou sobre as alternativas ao uso do petróleo na maquinaria e nos insumos agrícolas, e de Joao Brandao Rodriguez, veterinario e presidente da Asociaçao Portuguesa de Tracçao Animal, que expuxo as vantaxes que supón esta alternativa aos tractores.
Na sesión de tarde celebrouse unha mesa redonda sobre “Agricultura e Alimentación ¿Con qué enerxía?” moderada polo xornalista editor do programa A Labranza da TVG, Manuel Cruz Rodríguez, na que gandeiros, como o biólogo Francisco Xavier Fernández Arias, e propietario da gandería de ovino e vacún de carne da Caldaloba integrada no programa “Da Escola á Granxa”, e técnicos e outros expertos na materia expuxeron os seus puntos de vista,
A deputada de Medio Rural, Mónica Freire, subliñou que "a necesidade do debate sobre a optimización de custes enerxéticos nas granxas galegas, agudizado tras o inicio da guerra na Ucraína. Máis do 80% da enerxía que empregamos nos nosos procesos produtivos primarios segue a proceder de xeito directo ou indirecto do consumo de combustibles fósiles: petróleo, carbón e gas, o que condiciona determinantemente a viabilidade económica das mesmas"
“Estamos nunha situación mundial de incerteza. Galiza ten unha enorme capacidade para producir electricidade pero a nosa taxa de dependencia enerxética segue estando por enriba do 95%, que limita as posibilidades de acadar unha produción primaria propia para acadar a soberanía alimentaria", expuxo.
Marcos Vázquez, organizador das xornadas, destacou a necesidade de converter as ameazas en oportunidades e a urxencia de pensar nun novo paradigma de aforro enerxético coa redución do consumo eléctrico, o uso de novas fontes de enerxía como a biomasa, e o uso crecente de tracción animal en tarefas agrogandeiras e forestais máis específicas, ou aplicación de novas tecnoloxías como o motor de ciclo Otto con consumo de metano, entre outras cuestións"
A xornada completouse cunha visita polas instalacións a todos os asistentes poloas achegas patrimoniais que se agochan na colección museográfica do Muvicla, que con esta segunda edición consolida as Xornadas na axenda de gandeiros, técnicos e investigadores.
