Éxito da xornada De Lugo a Ancares: La Vuelta 24 organizada pola Deputación como antesala da cita deportiva de proxección mundial
“Esta charla permite aos seguidores coñecer de primeira man os segredos dunha organización na que están involucradas miles de persoas e o impacto para o territorio en termos económicos e turísticos”, sinalou José Tomé
Guillén avanzou que tanto os equipos como todo o persoal que mobiliza este evento deportivo pasará a noite anterior e a seguinte á etapa 13 en Lugo. Detallou que participarán 176 corredores de 22 equipos, e mobilizarán a unhas 3.000 persoas
Escartín abre a porta á participación do esloveno Tadej Pogačar en La Vuelta deste ano, aínda que “non é habitual que os grandes corredores participen nas tres grandes probas, pero ao mellor quere afrontar o reto de ser o primeiro en gañar as tres”
Éxito da xornada ciclista De Lugo a Ancares: La Vuelta 24 que organizou este martes a Deputación de Lugo no Pazo de San Marcos. O Presidente da institución provincial, José Tomé Roca, o director da proba, Javier Guillén, e do exciclista Fernando Escartín, participaron na charla-coloquio sobre La Vuelta Ciclista a España que se celebrou no Salón de Actos da sede provincial e que contou coa asistencia de numerosos afeccionados do ciclismo e seguidores deste evento deportivo de referencia a nivel internacional.
Durante a charla, José Tomé destacou a relevancia do paso de La Vuelta por Lugo xa que “supón unha grande proxección para a provincia tanto en termos económicos, como turísticos, dun valor incalculable”. Subliñou que eventos como este serven para achegar a emoción deste evento deportivo ao espectador. “Esta charla non só é interesante como antesala a La Vuelta, senón que tamén permite aos seus seguidores coñecer de primeira man os segredos dunha organización na que están involucradas miles de persoas e o impacto para o territorio en termos económicos e turísticos”, detallou.
Pola súa banda, Guillén avanzou que tanto os equipos como todo o persoal que mobiliza esta cita ciclista pasará a noite anterior e a seguinte á etapa 13 en Lugo. Nese sentido, o director xeral de La Vuelta fixo alusión a datos interesantes da organización, como que este ano a cita deportiva contará con 176 corredores dun total de 22 equipos, mobilizando a un total dunhas 3.000 persoas.
O evento ciclista, o máis importante do país e situado na elite xunto o Giro de Italia ou o Tour de Francia, conta tamén cun amplo dispositivo de seguridade composto por 8.000 policías e gardas civís para que todo se desenvolva da mellor maneira. A caravana de La Vuelta está composta por 1.100 vehículos lixeiros, 96 motos, 35 tráileres e 12 camións ríxidos de 7 metros, 26 autobuses para equipos e persoal de montaxe, 100 furgonetas, 7 helicópteros e 2 avións.
A cita conta este ano cunha achega da institución provincial de 40.000€ a través dun contrato de patrocinio coa entidade organizadora da proba, Unipublic. O percorrido da etapa 13 entre a capital da provincia e Os Ancares, pasará polos concellos de Lugo –inicio do percorrido co neutralizado, que percorrerá a Ronda da Muralla ata encarar a N-VI- O Corgo, Baralla, Becerreá e Cervantes.
Está previsto que, como en anos anteriores, La Vuelta sexa seguida por máis de 400 millóns de persoas dun total de 190 países, e como sinalou Guillén “excluído o fútbol, ningún deporte é quen de xuntar tanta xente”.
Preguntado polos afeccionados, Escartín sinalou a Ayuso e Carlos Rodríguez como os ciclistas españois que poderían ter máis proxección nas súas carreiras deportivas. Abriu a porta á participación do esloveno Tadej Pogačar na Vuelta, porque “non é habitual que os grandes corredores participen nas tres grandes probas -en referencia ao Giro e ao Tour de Francia- pero ao mellor quere afrontar o reto de ser o primeiro en gañar as tres”.
Asistiron tamén ao coloquio da tarde a Deputada de Réxime Interior, Promoción do Territorio e Turismo, Pilar García Porto; o Deputado de Promoción Económica e Social, Pablo Rivera Capón; a Deputada de Economía, Facenda e Especial de Contas, Carmela López; a Deputada de Muller e Igualdade, Marisol Morandeira; o Deputado de Formación, Ensino e Economía do Coñecemento e concelleiro en Lugo, Miguel Fernández; o Deputado de Medio Ambiente, Carlos López; e o Deputado de Recursos Sostibles, Francisco Cajoto. Acudiron tamén os Alcaldes dos concellos de Cervantes, Baralla e Pol, Benigno Gómez Tadín, Miguel González e Lino Rodríguez, entre outras autoridades.
