A Deputación acolle en San Marcos unha mesa redonda sobre igualdade e deporte feminino
A atleta Nuria López, a futbolista Asia Antón, a baloncestistaArantxa Novo, a xogadora de fútbol sala Area Loureiro e a xogadora de voleibol Talita do Nascimento compartiron cos asistentes as súas experiencias persoais para chegar a elite
A Deputada de Muller e Igualdade deu a benvida aos participantes que se reuniron no Salón de Actos e sinalou que a iniciativa da Deputación aproveita o poder transformador do deporte, que é “o espello no que se miran centos de miles de persoas”
A Deputada de Muller e Igualdade, MarisolMorandeira, deu esta mañá a benvida aos participantes dunha mesa redonda sobre igualdade e deporte feminino que tivo lugar no Pazo de San Marcos. A cita, que se enmarca no programa Unha tripla pola igualdade impulsado pola institución provincial para visibilizar, apoiar e fomentar o deporte feminino, contou con mulleres referentes en disciplinas deportivas como voleibol, fútbol, baloncesto e atletismo.
“Celebrada xa a parte competitiva do programa e tamén as visitas escolares das xogadoras do Ensino a centros da provincia; esta mañá queremos abrir un espazo de debate da man de mulleres referentes”, explicou a Deputada. “O deporte ten un gran poder para transmitir valores e transformar a sociedade, porque é o espello no que se miran centos de miles de persoas”, engadiu.
A atleta Nuria López, a futbolista Asia Antón, a baloncestistaArantxa Novo, a xogadora de fútbol sala Area Loureiro e a xogadora de voleibol Talita do Nascimento, moderadas pola xornalista Sara Meijide, compartiron cos asistentes as súas experiencias persoais para chegar á elite.
Valorou Morandeira que moitas veces “detrás das mulleres deportistas hai historias incribles” porque “se calquera persoa ten que facer uns sacrificios enormes para chegar a elite do deporte, as mulleres teñen que sortear ademais toda unha serie de obstáculos sociais e estruturais enormes”. Nese sentido mencionou as diferencias salariais, a menor visibilidade pola baixa cobertura mediática, os estereotipos de xénero, a falta de infraestrutura e apoio, a discriminación e o acoso, as presións sobre a imaxe corporal, ou a dobre xornada entre a parte deportiva e a persoal.
Sinalou que na Deputación “cremos que o deporte pode ser un gran aliado para seguir avanzando en igualdade e por iso organizamos este tipo de actividades. Porque é importante coñecer e falar destas cousas, para poder crear conciencia na sociedade e seguir presionando entre todos para non dar pasos atrás”. Detallou a Deputada tamén que desde o Goberno provincial “temos o compromiso de aplicar a perspectiva de xénero en toda a nosa acción política, porque queremos avanzar nesa senda cara unha sociedade máis igualitaria e máis xusta”.
