A Deputación destina máis de 1,3M€ á mellora de 10 vías provinciais nas comarcas de Lugo, Terra Chá e A Ulloa

A Xunta de Goberno da Deputación de Lugo aprobou este venres a licitación de catro contratos por algo máis de 1,3M€ para realizar obras de acondicionamento e mellora en 10 vías provinciais das comarcas de Lugo, Terra Chá e A Ulloa, en concreto ao seu paso polos concellos de Portomarín, Guntín, Begonte, Friol, Lugo, Outeiro de Rei, Palas de Rei, Cospeito e Vilalba. Así o informou este venres a Voceira socialista do Goberno, Pilar García Porto, tras celebrar a reunión da Xunta de Goberno. 

Por unha banda, a institución provincial mellorará con máis de 340.000€ dous tramos da LU-P-4902, entre Portomarín e Guntín, a vía que conecta o Alto do Valiño con Valdeporrás por Vilaxuste. Os traballos afectarán ao primeiro quilómetro da estrada e ao treito comprendido entre o punto quilométrico 4,100 e 11,315 e consistirán na reapertura das cunetas, pavimentación con aglomerado en quente e sinalización horizontal. 

García Porto fixo referencia a importancia desta actuación, que conta cun prazo de execución de 3 meses unha vez iniciadas as obras, “porque se trata dunha das estradas máis empregadas no concello de Portomarín, pois atravesa o municipio dun extremo ao outro. Ademais, este proxecto completará os traballos que xa realizamos recentemente entre os quilómetros 1 e 4”.

Por outra banda, tamén se aprobou na sesión desta mañá a licitación por preto de 370.000€ das obras para mellorar 5 estradas ao seu paso polos concellos de Begonte, Friol, Lugo e Outeiro de Rei. En concreto, o proxecto inclúe:

- Os 5 primeiros quilómetros da LU-P-0802, que conecta Begonte e Santalla.
- A LU-P-2905, que vai de Ombreiro a Aspai, no tramo inicial ata o quilómetro 6,654.
- Case 3 quilómetros ao inicio da LU-P-3903, que vai de Santo Estevo a Donalbai.
- Preto do primeiro quilómetro da LU-P-3904, de Xueus a Feira da Gaioso.
- Os 13 primeiros quilómetros da LU-P-5101, entre Rábade e Friol. 

Pilar García Porto recalcou que este proxecto “mellorará de xeito significativo as comunicacións destes catro concellos” e destacou que “os traballos consistirán na reapertura de cunetas, na reparación de desperfectos e na repavimentación. O prazo de execución para todas estas actuacións é de 4 meses desde o inicio das obras”. 

A Deputación aprobou tamén un investimento de máis de 145.000€ para mellorar tres estradas provinciais de Palas de Rei. En concreto, acondicionarase a LU-P-4006, que conecta a vila de Palas con Quindimil, do punto quilométrico 2,630 ao 3,975; na LU-P-4009, que vai de Ribeira á rampla de Covelo por Vilaseños, do inicio da vía ao 5,287; e na LU-P-4011, que une Palas desde o cemiterio con Tarrios e o ramal a Burdallos; dos primeiros 300 metros ata o quilómetro 2,098; e o ramal que son case 900 metros máis. 

Nas tres estradas as actuacións consistirán na reapertura de cunetas, obras de drenaxe, reparación de desperfectos, repavimentación e sinalización vertical. O prazo para acometer estas obras é de 3 meses desde o seu inicio.

Por último, en materia de mobilidade, licitouse unha actuación entre os concellos de Cospeito e Vilalba, para mellorar 8 quilómetros da LU-P-1702, que é a estrada que une Feira do Monte con Fontefría polo Pino. A institución provincial inviste máis de 430.000€ para rehabilitar o tramo comprendido entre o punto quilométrico 1,385 e o 9,214. O prazo de execución destas obras é de 3 meses e consistirán na reapertura de cunetas, na pavimentación con aglomerado en quente e na reposición da sinalización mediante o pintado da vía. 

García Porto recalcou que “esta actuación completa a que acometeu a Deputación de Lugo o ano pasado ao comezo da estrada e que ademais, é unha vía importantísima para a comarca da Terra Chá porque dá servizo directo a máis dun milleiro de habitantes”. 

Máis de 3M€ para 24 vías provinciais

A Voceira socialista do Goberno recalcou que “só este mes aprobamos un investimento de máis de 3M€ para mellorar 24 estradas provinciais ao seu paso por 16 concellos da nosa provincia. O que dá boa conta por unha parte, do esforzo investidor que está a facer a Deputación de Lugo para o mantemento da rede de estradas provinciais –a máis extensa de todas as Deputacións de España con 4.217 quilómetros-; e por outra, da axilidade coa que traballamos para ser o máis útiles posibles aos veciños e veciñas desta provincia”. 

Nese sentido, lembrou que “este ano, segundo o anunciara o Presidente, temos comprometidos nos nosos Orzamentos 27M€ para o mantemento, conservación e mellora das estradas provinciais, o que representa máis do 20% do noso presuposto e que supón un 42% respecto ó que investimos o ano pasado”. 

Outros asuntos

Así mesmo, a Xunta de Goberno tamén aprobou a licitación por case 295.000€ do contrato do servizo de control de calidade das obras e actuacións da Deputación de Lugo. O contrato divídese en 3 lotes: o lote 1, que inclúe o control de calidade nas obras dos diferentes servizos da Deputación; o lote 2, para o control de calidade das obras e servizos de conservación dirixidos desde o Servizo de Vías e Obras; e o lote 3 que inclúe o control e calidade relativo ás prestacións executadas pola Deputación desde o Servizo de Parque Móbil. 

Licitado tamén por un total de 54.000€ o contrato para o subministro de pneumáticos dos vehículos e das máquinas do Parque Móbil e da Granxa Gayoso Castro. A duración deste contrato será dun ano e poderá prorrogarse anualmente ata un máximo de 4 anos. 

Por último, a Xunta de Goberno adxudicou por case 23.000€ o contrato de renovación das licenzas de software antivirus para os equipos de postos de traballo da institución provincial. A empresa adxudicataria foi Inforhouse, S.L. e a duración do contrato é de dous anos prorrogables por outro máis.