O Presidente conmemora o Día do Medio Ambiente cos nenos e nenas que participan nun taller organizado pola Deputación

O Presidente da Deputación de Lugo, José Tomé Roca, acompañou este xoves ás ducias de persoas que participaron no obradoiro familiar, organizado pola institución provincial, con motivo do Día Mundial do Medio Ambiente. Os cativos e cativas, acompañados polas súas familias, elaboraron diversos marcapáxinas a partir de plásticos reciclados, unha actividade de educación ambiental que se enmarcou dentro da campaña internacional deste ano, centrada na loita contra a contaminación por plásticos. 

Tomé Roca aproveitou o encontro cos participantes deste obradoiro de lecer saudable para recordarlles a importancia de conservar o medio natural, reducir o consumo de plásticos e adoptar hábitos máis sostibles no seu día a día que contribúan ao coidado do planeta.