O Presidente da Deputación de Lugo recibe ao Duque de Alba e Conde de Lemos no Pazo de San Marcos
O Presidente da Deputación de Lugo, José Tomé Roca, ofreceu este domingo no Pazo de San Marcos unha recepción institucional ao XXIII Conde de Lemos e XIX Duque de Alba, Carlos Fitz-James Stuart e Martínez de Irujo. Un encontro que se produce con motivo da visita do representante nobiliario á provincia de Lugo, que no día de onte, foi nomeado fillo adoptivo de Monforte de Lemos, simbolizando con este xesto a relevancia histórica e cultural entre provincia de Lugo e fortalecemento lazos cunha das casas nobres máis antigas e prestixiosas de España.
Durante a recepción, José Tomé Roca, agradeceu ao Duque a súa visita á sede provincial, onde asinou no Libro de Ouro da Deputación e realizou unha visita guiada ás instalacións do Pazo para coñecer a historia e a arquitectura deste icónico edificio do século XVIII.
Como xesto de agradecemento, o mandatario provincial entregoulle a Carlos Fitz-James Stuart e Martínez de Irujo, e o seu acompañante, Javier del Arco, integrante da Real Cofraría de Nobres da Nosa Señora do Portillo, como agasallo institucional un exemplar do libro Proxectos para o Hospital de Isabel II, o Instituto de 2ª Ensinanza e a Deputación Provincial de Lugo, e unha placa de cristal coa fachada do Pazo de San Marcos gravada.
No acto institucional, tamén estiveron presentes os Deputados de Promoción Económica e Social, Pablo Rivera; de Formación, Ensino e Economía do Coñecemento, Miguel Fernández; de Medio Ambiente, Carlos López; e a Deputada de Réxime Interior, Promoción do Territorio e Turismo, Pilar García Porto; así como o Deputado provincial, Antonio Ameijide; a Subdelegada do Goberno en Lugo, Isabel Rodríguez; e a Alcaldesa do Concello de Lugo, Paula Alvarellos.
A visita rematou pola tarde en Monforte de Lemos, onde antes de emprender regreso a Madrid, os representantes nobiliarios xunto ao Presidente da Deputación de Lugo, e tamén Alcalde da cidade do Cabe, fixeron unha última visita á adega Algueira da Ribeira Sacra para participar nunha cata comentada e unha degustación con produtos típicos da zona.
