A Deputación abre mañá o prazo para participar na segunda edición do programa gratuíto de educación ambiental Exploradores do Miño

A Deputación de Lugo pon en marcha a segunda edición do programa gratuíto Exploradores do Miño, a iniciativa de educación ambiental creada pola institución provincial o pasado ano e na que poden participar nenos e nenas de entre 6 a 11 anos. Nesta convocatoria incorpóranse case unha vintena de actividades de lecer dirixidas a concienciar aos máis pequenos sobre a importancia de conservar e coidar do medio ambiente, ao tempo que tamén facilita a conciliación das familias.

A programación, na que se inclúen un total de 20 prazas por proposta, desenvolverase todos os venres do 24 de xaneiro ata 27 de xuño en horario de 17:00 horas a 19:00 horas no Centro de Interpretación Terras do Miño. 

Desde este venres, 10 de xaneiro, ás 12:00 horas poden formalizarse as inscricións na páxina web https://inscricions.deputacionlugo.org/gl/tema/actividades-medioambientais ou a través do correo electrónico und.medioambiente@deputacionlugo.org. As persoas interesadas en consultar máis información poden facelo chamando ao 982 227 812.

Ademais, os nenos e nenas que participen conseguirán un kit de produtos coa imaxe desta iniciativa. As actividades previstas son:

•    Aprender a reciclar.
•    Aprender a compostar.
•    Aprender a vermicompostar.
•    Papel reciclado.
•    Encadernación de libros en papel reciclado.
•    Saída para recoñecer árbores, recoller follas e facer herbario.
•    Xoguetes con materiais reciclados.
•    Saída para recoñecer herbas.
•    O ciclo da auga.
•    Creación dun xogo de mesa sobre medio ambiente.
•    Facemos un niño de paxaros.
•    Recoñecer animais da biosfera.
•    Facer un mapa con topónimos.
•    Representamos lendas da Terra do Miño.
•    Protexer a nosa contorna, con saída para recoller restos non biodegradables.
•    Deportes ao aire libre.
•    Plantación de especies hortícolas autóctonas.