A Rede Museística Provincial ofrece visitas guiadas de curta duración que propoñen novas miradas sobre as obras das exposicións permanentes
Os museos sempre teñen algo novo que mostrar e a través das visitas guiadas pódense coñecer novas miradas sobre o xa visto. Por iso para este mes de agosto, a Rede Museística Provincial de Lugo prepara unha ampla axenda de visitas gratuítas de curta duración aos museos que xestiona: Sabías que? Mirar...Sentir...na RMPL.
Este tipo de visitas curtas, formuladas para 20 minutos, permiten coñecer en pouco tempo as historias ocultas detrás das pezas das exposicións permanentes dos museos. O obxectivo é que as persoas se acheguen aos museos con tódolos sentidos, non pasear véndoo, se non miralo con novos ollos para poder sentilo. "As persoas que coñecen os museos, achegaranse a eles con outros ollos e as persoas de fóra levaranse pedaciños da alma das e dos lucenses, descubrindo de verdade o noso patrimonio", explicaron a deputada de Cultura Iria Castro e a xerente da RMPL Encarna Lago na presentación da iniciativa.
No Museo Provincial de Lugo, as visitas terán a seguinte axenda de martes a venres:
8, 9, 10 e 11 de agosto ás 17:00
15, 16, 17 e 18 de agosto ás 12:00
22, 23, 24 e 25 de agosto ás 17:00
29, 30 e 31 de agosto ás 12:00
Nesas mesmas xornadas, en horario de 12:30 realizaranse visitas en liña aos outros museos da Rede (Museo Provincial do Mar en San Cibrao; Museo Fortazaleza de San Paio de Narla en Friol e o Museo Pazo de Tor en Monforte de Lemos) a través do Facebook da RMPL. No Museo Pazo de Tor as visitas son sempre guiadas e previa cita, de martes a domingo ás 11:00, 12:30, 16:30 e 18:00.
