O Pazo de San Marcos acollerá o venres unha xornada de formación sobre enfermidades animais dirixida ás gandeirías
O Pazo de San Marcos acollerá o venres – 19 de xullo - a xornada “Novos desafíos nas producións gandeiras. Lingua Azul, EHE e parasitos” promovida pola Asociación de produtoras e produtores ecolóxicos de Galicia (Proecogal) coa colaboración da área de Rural da Vicepresidencia da Deputación de Lugo.
O deputado Daniel García, acompañado por Javier Fernández e José Gonzalez, representantes da entidade, presentaron o programa da xornada, na que investigadores e profesionais da sanidade animal abordarán cuestións relativas á incidencia,a prevención ou ao control de enfermidades que están afectar á cabana gandeira como a lingua azul, a enfermidade hemorráxica epizoótica (EHE) ou outras afeccións transmitidas por parasitos.
Daniel García explicou que “a xornada pretende proporcionar a gandeiras e gandeiros información rigurosa sobre as causas e a evolución destas enfermidades, cunha incidencia que debemos avaliar no contexto dos retos que o cambio climático supón para o sector” e destacou que “apoiamos as accións do asociacionismo gandeiro, ao tempo que seguimos reclamando á Xunta de Galicia, que ten as competencias e os recursos neste materia, unha correcta planificación e xestión das accións de prevención e seguimento destas enfermidades, que causan importantes perdas ás gandeirías”.
As xornadas, gratuítas e abertas á participación de gandeiras e gandeiros tanto de producións ecolóxicas como convencionais, desenvolveranse de 10.45 a 13.30 horas no Salón de Actos da Deputación de Lugo. A inscrición pode realizarse a través dun formulario en liña dispoñible nos perfis de redes sociais de Proecogal.
Novos desafíos nas producións gandeiras. Lingua Azul, EHE e parasitos. Programa:
Nocións sobre as garrapatas como base para o seu control. Pablo Díaz Fernández. Profesor USC
EHE, experiencia dun veterinario de campo. Enrique Gutiérrez Vázquez
Enfermidades transmitidas por Culicoides...que sabemos realmente? Alberto Prieto. Profesor Sanidade Animal USC.
