A Deputación súmase aos actos organizados por Raiolas Lugo para conmemorar o Día Mundial do Autismo
O Deputado de Promoción Económica e Social, Pablo Rivera Capón, participou este mércores diante da Casa Consistorial de Lugo nos actos organizados por Raiolas con motivo do Día Mundial de Concienciación sobre o autismo. A programación de actividades, que puxo en marcha a entidade lucense, iniciouse esta mañá coa lectura do manifesto e continuará pola tarde cunha exhibición de baile da Escola de Danza Star Dance e unha serie de xogos populares nos que poderán participar os veciños de veciñas. Nesta xornada, a institución provincial tamén iluminará a fachada do Pazo de San Marcos de cor azul, símbolo desta enfermidade, co obxectivo de concienciar á cidadanía sobre o autismo.
Rivera Capón incidiu na colaboración continua que mantén a Deputación de Lugo con Raiolas “entidade á que destinamos unha achega económica de 22.000€ para atender aos seus usuarios e usuarias”. Nesta liña, tamén recordou que “a institución provincial cedeu gratuitamente o local da antiga gardería do Campus de Lugo para que Raiolas puidera construír o primeiro Centro de Día da provincia para persoas con TEA e investiu preto de 112.000€ nas obras de acondicionamento”.
