A Deputación de Lugo vende na poxa de Pedrafita 5 xovencas da Granxa Gayoso Castro
O Deputado de Medio Ambiente, Carlos López López, participou este sábado na poxa de novelas de Raza Rubia Galega que se celebrou no recinto feiral de Pedrafita do Cebreiro. A Deputación de Lugo vendeu as cinco xovencas do centro de recría da Granxa Gayoso Castro que presentou e que acadaron un prezo medio de 7.280€.
Carlos López destacou que a Granxa Gayoso Castro é “un dos piares da ampla actividade de apoio ao sector primario que desenvolvemos na Deputación de Lugo, que converteu este centro situado en Castro de Rei nun referente e un motor da actividade agrogandeira na provincia e no conxunto de Galicia a través da formación e a investigación”.
Estas instalacións provinciais son un referente na recría e na promoción da raza autóctona realizando un importante labor de apoio á recría de Rubia Galega en colaboración con ACRUGA. A granxa conta co primeiro centro de iniciativa pública creado en España para a recría de gando vacún de leite e, dende finais do ano 2020, coa Granxa Experimental de Leite, un centro pioneiro en Galicia, pois é o primeiro que une formación e investigación universitarias en torno ao sector lácteo.
