As rutas fluviais da Deputación pola Ribeira Sacra tiveron esta Semana Santa preto dun 80% de ocupación

As rutas fluviais da Deputación de Lugo para descubrir a Ribeira Sacra tiveron esta Semana Santa preto dun 80% de ocupación. Desde o luns 14 de abril ao domingo, 16, viaxaron nos catamaráns da Deputación de Lugo un total de 2.123 persoas. “Son cifras boísimas tendo en conta o mal tempo que fixo estes días en toda Galicia”, valorou a Deputada de Réxime Interior, Promoción do Territorio e Turismo, Pilar García Porto.

“Unha acollida que dá boa conta da calidade deste servizo público e do seu impacto na dinamización económica e social da comarca”, reafirmou a responsable provincial sobre as rutas da institución que descorren polo río Miño e polo río Sil.

En abril, con motivo da Semana Santa, a Deputación ofreceu un servizo ininterrompido do luns 14 ao domingo 20, operando nas dúas rutas do Mencía, en horario tanto de mañá como de tarde. O resto do mes, os catamaráns da institución provincial navegarán de mércores a domingo pola ruta Canón do Sil e no caso de Cabo do Mundo haberá viaxes nas fins de semana.

A institución provincial volverá reforzar os horarios en ambas rutas na ponte do 1 de maio pola festividade do Traballo e as persoas interesadas poden adquirir os seus billetes na páxina reservas.rutasembalses.es.

Datas e horarios das rutas

No caso da ruta fluvial Canón do Sil funcionan dúas travesías cunha capacidade total de 159 prazas, distribuídas en 107 prazas no catamarán Mencía e 52 no monocasco Canón do Sil. Pola súa banda, a ruta fluvial Cabo do Mundo conta cunha capacidade total de 63 viaxeiros no catamarán Pelegrín.  

En maio, a ruta Canón do Sil que sae do embarcadoiro de Ponte do Sil, ofrecerá servizo no catamarán Mencía de mércores a venres con dous horarios, ás 11:30 e ás 16:30 horas. Con motivo da festividade do Traballo, a ponte do 1 e o 2 maio, e as fins de semana entrará tamén en servizo o monocasco Canón do Sil, ofrecendo entre ambas embarcacións rutas ás 11:00, ás 11:30, ás 16:30 e ás 17:00 horas. A ruta Cabo do Mundo, que sae desde o embarcadoiro de Belesar Pobo, ofertará as fins de semana e os días 1 e 2 de maio viaxes no catamarán Pelegrín ás 11:30 e ás 16:30 horas.

No mes de xuño sairán viaxes desde Ponte do Sil de luns a venres ás  11:30, 16:30 e 19:00 e as fins de semana ás 11:00, 11:30, 16:00, 17:00 e 19:00 horas. Este mes, na ruta Cabo do Mundo haberá viaxes de mércores a domingo en horarios ás 11:30, 16:30 e 19:30 horas.

Os viaxeiros poderán facer as rutas todos os días nos meses de xullo, agosto e setembro. Ata o 14 de setembro poderán escoller a ruta Canón do Sil en horario de 11:00, 11:30, 16:00, 17:00 e 19:00 horas, ou a de Cabo do Mundo ás 11:30, 16:30 e 19:00. A partir de mediados de setembro os catamaráns no sairán xa á noitiña nin desde o embarcadoiro de Ponte do Sil nin desde Belesar Pobo, polo que deixarán de ofrecerse as rutas das 19:00 e das 19:30, manténdose o resto das opcións horarias. 

No mes de outubro a ruta Canón do Sil ofrecerá servizo no catamarán Mencía de mércores a venres con dous horarios, ás 11:30 e ás 16:30 horas. As fins de semana e os días 8, 9 e 10, coincidindo coa ponte do Pilar, entrará tamén en servizo o monocasco Canón do Sil, ofrecendo entre ambas embarcacións rutas ás 11:00, ás 11:30, ás 16:00 e ás 16:30 horas. A ruta Cabo do Mundo ofertará as fins de semana e os días 8, 9 e 10 viaxes ás 11:30 e ás 16:30 horas.

En novembro os viaxeiros só poderán facer rutas en catamarán nas fins de semana. Durante o primeiro fin de semana, con motivo da festividade de Todos os Santos, a ruta Canón do Sil ofrecerá viaxes ás 11:00, ás 11:30, ás 16:00 e ás 16:30 horas. Desde a fin de semana do 8 e 9 de novembro só operará o catamarán Mencía no embarcadoiro Ponte do Sil, con saída ás 11:30 e ás 16:00. A ruta Cabo do Mundo funcionará todo o mes ás fins de semana ás 11:30 e ás 16:00 horas.

O servizo rematará coa ponte de Decembro. Entre os días 1 e 8 desde mes, o embarcadoiro Ponte do Sil e Belesar Pobo ofertarán viaxes ás 11:30 e ás 16:00 horas.