A Deputación organiza novas actividades gratuítas de lecer e educación ambiental en Terras do Miño e Ancares Lucenses
Rutas en kaiak, itinerarios pola natureza, obradoiros de carpintería ou fotografía, unha xornada sobre os morcegos e outra para achegarse á astronomía con acampada nocturna son algunhas das iniciativas que están programadas
As actividades teñen o aforo limitado, polo que as persoas interesadas deberán reservar praza a partir de mañá, mércores, a través da páxina web da Deputación e dos números de teléfono 982.227.812 e 982.227.813
A Deputación de Lugo organiza un novo programa de actividades gratuítas para fomentar o lecer saudable e a educación ambiental nas reservas da biosfera de Terras do Miño e Os Ancares Lucenses, Montes de Cervantes, Navia e Becerreá. A programación inclúe once propostas para todos os públicos, que se desenvolverán no terceiro trimestre do ano, dende o 2 de xullo ata o 30 de setembro.
O prazo de inscrición ábrese este mércores, a partir das 00.00 horas. As actividades teñen o aforo limitado, polo que as persoas interesadas deberán anotarse a través das diferentes canles da institución provincial. Para as iniciativas que se desenvolvan na Reserva dos Ancares Lucenses, Montes de Cervantes, Navia e Becerreá estarán dispoñibles os números de teléfono 982.227.812 e 982.227.813 e para as que teñan lugar na Reserva da Biosfera de Terras do Miño haberá habilitado un espazo na web: https://inscricions.deputacionlugo.org/gl/tema/actividades-medioambientais.
Propostas en Terras do Miño
A primeira proposta na Reserva de Terras do Miño será Rutas en kaiak, unha actividade para todos os públicos que se desenvolverá desde a Escola Lucense de Piragüismo do 4 ao 8 de xullo, en horario de mañá: de 10:00 a 14:00 horas. Haberá 10 prazas dispoñibles.
Do día 11 ao 15 de xullo está programada a actividade Cinco días na Natureza, unha actividade para nenas e nenos que se desenvolverá en horario de mañá, de 10.00 a 14.00 horas, e que conta con 15 prazas. O punto de partida será o Centro de Interpretación Terras do Miño.
Xa no mes de setembro, do día 5 ao 9, haberá outra actividade que sairá desde o Centro de Interpretación Terras do Miño e que está pensada para os máis pequenos da casa: Coñecendo a natureza do Paseo do Río Rato. Son 15 prazas e poderase desfrutar tamén en horario de mañá, de 10:00 a 14:00 horas.
Entre o 19 e o 23 de setembro, os adultos poderán aprender de ebanistería no Obradoiro de Carpintería que se celebrará no Centro de Interpretación Terras do Miño de 10:00 a 14:00 horas da mañá. Haberá 12 prazas dispoñibles para as persoas interesadas.
O Centro de Interpretación Terras do Miño tamén será o escenario para as xornadas de Aproveitamento de recursos: conservas, herbas medicinais e tinturas naturais. Unha actividade pensada para os adultos que se desenvolverá entre os días 26 e 30 de setembro, en horario de 10:00 a 14:00 horas, e para a que haberá 15 prazas.
Propostas nos Ancares Lucenses, Montes de Cervantes, Navia e Becerreá
Cervantes acollerá a primeira actividade da Montaña. Os días 2 e 9 de xullo haberá un Obradoiro de fotografía co móbil destinado aos adultos. Terá lugar na Escola de Piornedo en horario de 16:00 a 20:00 horas e haberá dispoñibles 15 prazas. O alumnado do CPI de Cervantes poderá desfrutar os días 16 e 17 de setembro dunha Xornada de astronomía con acampada nocturna para a que haberá 30 prazas. A actividade terá lugar de 19:00 a 00:30 horas.
O concello de Navia de Suarna acollerá entre os días 1 e 5 de agosto a actividade Reciclaxe e valores ambientais. Celebrarase na Escola de Barcia, estará destinada a nenas e nenos de 3 a 12 anos e terá lugar en horario de mañá, de 10:00 a 14:00 horas. Haberá dispoñibles 20 prazas. O 10 de setembro, desde a Escola de Barcia sairá ás 10:00 horas o Roteiro Navia no verán, unha iniciativa pensada para as familias e para a que haberá outras 20 prazas.
Becerreá acollerá unha Xornada de Divulgación de morcegos o 3 de setembro. Unha iniciativa pensada para as familias que contará con charla, obradoiro e saída nocturna. O punto de partida será o Telecentro do municipio, terá lugar en horario de tarde, de 19:00 a 20:00 horas. O 6 de setembro as nenas e nenos poderán apuntarse a Cantos e costumes das aves, unha actividade para a que haberá 20 prazas e que se desenvolverá no Centro Social de Becerreá entre as 10:00 e as 14:00 horas.
