A Deputación aporta 80.000€ a Quiroga para a ampliación e mellora do cemiterio municipal
![](/sites/deputacionlugo.org/files/2022-12/211222%20Convenio%20Quiroga.jpeg)
O mandatario provincial enmarcou este acordo no compromiso de máxima colaboración da Deputación con todos os concellos da provincia “para que poidan ofrecer máis e mellores servizos públicos ós seus veciños e veciñas”
O Presidente da Deputación de Lugo, José Tomé Roca, asinou co Alcalde de Quiroga, Julio Álvarez, un convenio de colaboración a través do cal a institución provincial achega 80.000€ ao Concello para a ampliación e mellora do cemiterio municipal.
José Tomé destacou a importancia deste acordo, que responde á prioridade marcada pola institución de prestar a máxima colaboración posible a todos os concellos da provincia “para que poidan ofrecer máis e mellores servizos públicos aos seus veciños e veciñas”.
Entre as melloras que o Concello poderá realizar grazas á aportación da Deputación está a de dotar ao camposanto de 1.138 unidades de enterramento máis –entre panteóns e nichos-, novos accesos, zonas axardinadas, un local de culto, aseos, almacén e peche. A actuación contará cun orzamento conxunto de 358.160€.
“Unha obra importante, para a que o Alcalde nos pediu colaboración, e á que hoxe lle damos cumprida resposta, para que os veciños e veciñas de Quiroga poidan dispoñer dos servizos que precisan”, subliñou Tomé Roca, que explicou que esta é a forma de traballar da Deputación. “O investimento que formalizamos aquí é un exemplo do modelo de xestión e de facer política que practicamos na institución provincial”, sinalou.
Por unha banda, concretou o Presidente, “practicamos unha política de feitos”, pois “non viñemos para facer ningunha promesa ou anuncio, senón xa, directamente, para firmar o convenio que permitirá sacar adiante o proxecto de ampliación do cemiterio de Quiroga”.
Por outra banda, explicou, “practicamos unha política de máxima colaboración cos 67 concellos da provincia de Lugo para que poidan ofrecer máis e mellores servizos públicos aos seus veciños, sobre todo no rural”. “Na Deputación traballamos para servir aos concellos con equidade, goberne quen goberne, sen mirar con diferencia a uns municipios sobre os outros”, subliñou o mandatario provincial.
2M€ da Deputación para Quiroga
O Presidente destacou que a colaboración formalizada hoxe co Concello de Quiroga “súmase ao apoio económico que vimos dando nos últimos anos, con instrumentos como o Plan Único, entre outros, tanto para servizos, como para infraestruturas, ou para a actividade do tecido social e económico deste municipio”. Un apoio “moi relevante” porque, recalcou, só no que vai de mandato a Deputación achegou a este concello practicamente 2M€.