A Deputación organiza novas actividades divulgativas para toda a familia na Reserva dos Ancares Lucenses
As inscricións faranse por orde de reserva ata cubrir as prazas ofertadas para cada unha das accións. As persoas interesadas poden anotarse dirixíndose ao correo ancareslucenses@deputacionlugo.org ou chamando ao 982 227 812 ou 982 227 813
A Deputación de Lugo organiza unha nova programación de actividades de divulgación e educación ambiental sobre a Reserva da Biosfera dos Ancares Lucenses e Montes de Cervantes, Navia e Becerreá, un territorio recoñecido pola UNESCO que xestiona a propia institución provincial.
As seis accións, totalmente gratuítas, desenvolveranse durante o mes de marzo en distintos puntos dos concellos que conforman a Reserva: Cervantes, Navia de Suarna e Becerreá. Todas aquelas persoas interesadas en anotarse para participar nalgunha das actividades poderán reservar a súa praza chamando ao 982 227 812 ou 982 227 813, e tamén a través do correo electrónico ancareslucenses@deputacionlugo.org As inscricións faranse por rigorosa orde de reserva.
Estas iniciativas forman parte da liña de traballo que se marca a Deputación de Lugo dende as dúas Reservas que xestiona para impulsar accións e actividades que redunden na conservación e mellora do territorio a través da sensibilización e divulgación.
Programación
O programa está dirixido a todos os públicos e inclúe obradoiros, concertos e cursos:
Becerreá
- 11 e 12 de marzo: Demouca e recuperación de soutos abandonados. Actividade dirixida a adultos, no Centro Social de Becerreá, de 10.00h a 14.00 h e de 16.00h a 20.00h. Prazas dispoñibles: 15.
- 11, 18 e 25 de marzo: Curso de debuxo sobre o patrimonio artístico e natural dos Ancares. Actividade orientada a nenos e nenas, no Centro Social de Becerreá, en horario de 16.30h a 19.30h. Prazas dispoñibles: 15.
Navia de Suarna
- 11 e 18 de marzo: Obradoiro de vimbio. Orientado a adultos, na Escola de Barcia, entre as 16.30h e 21.00h. Prazas dispoñibles: 15.
- 22 de marzo: Curso de cociña tradicional con produtos dos Ancares. Actividade dirixida a adultos no Bar Xegunde, de 16.00h. a 20.00h. Prazas dispoñibles: 15.
Cervantes
- 22 de marzo: Concerto didáctico sobre sons da natureza. Realizarase esta actividade con motivo do Día Mundial da Auga no CPI Cervantes, en horario de 12.30h a 13.30h. Dirixida a nenos e nenas.
- 25 de marzo: Obradoiro de vimbio. Esta actividade está dirixida a adultos e farase no edificio de Servizos Múltiples. Será en horario de 16.00h. a 20.00h. Prazas dispoñibles: 15.
