O Presidente anuncia un Plan de Sostibilidade Turística para conseguir 1,5M€ de investimento dedicado aos concellos de Palas de Rei, Monterroso e Antas de Ulla
O mandatario provincial enmarcou a decisión de solicitar este Plan “no compromiso firme que mantemos coa Ulloa, á que levamos destinado neste mandado preto de 9M€ para mellorar os servizos públicos e as infraestruturas, e na que temos en marcha un proxecto de referencia como é o Parque Central de Galicia”
A candidatura responde tamén á “ampla estratexia que temos marcada na Deputación para potenciar o turismo sostible e de calidade como factor de desenvolvemento social e económico da provincia, un sector que crea riqueza e emprego e que, polo tanto, contribúe a fixar poboación no noso rural”
“Esperamos contar co apoio e colaboración da Xunta de Galicia para que este investimento sexa unha realidade”, xa que, unha vez presentada a solicitude ó Ministerio, é a Administración autonómica a que ten que valorar e respaldar a candidatura para que sexa preferente
Entre outras moitas accións, inclúese a creación e adecuación de camiños ciclables e sendeiros, a iluminación en monumentos, a instalación de puntos de recarga de vehículos eléctricos, a realización de experiencias en realidade aumentada ou a certificación de sostibilidade para establecementos de hostalería
O Presidente da Deputación de Lugo, José Tomé Roca, xunto á Deputada de Réxime Interior, Promoción do Territorio e Turismo, Pilar García Porto, anunciou este sábado un Plan de Sostibilidade Turística en Destino para a comarca da Ulloa, un “ambicioso” proxecto co que a institución aspira a conseguir 1,5M€ para investir nos concellos de Palas de Rei, Monterroso e Antas de Ulla concorrendo aos fondos mobilizados polo Ministerio de Industria, Comercio e Turismo para mellorar e diversificar o sector turístico de acordo cos obxectivos da Axenda 2030.
O mandatario provincial presentou o plan nun acto público organizado pola Deputación no Castelo de Pambre ante representantes dos concellos e do tecido social, cultural e económico da comarca da Ulloa.
O proxecto, explicou o Presidente, inclúe “un amplo paquete de accións dirixidas a reforzar o turismo como un sector que crea riqueza e emprego, e que polo tanto, contribúe a fixar poboación no noso rural. Un obxectivo ao que estamos totalmente dedicados na Deputación”.
José Tomé enmarcou a decisión de presentar este Plan de Sostibilidade Turística en Destino, “primeiro polo compromiso firme que mantemos dende a Deputación coa comarca da Ulloa, e tamén porque, dentro do proxecto que temos para o conxunto da provincia, marcamos como prioridade o apoio aos sectores produtivos, nomeadamente ao sector primario e ao turismo”.
Peso específico da Ulloa na xestión da Deputación
José Tomé destacou que A Ulloa “ten unha identidade propia, ben diferenciada. É unha fermosa terra de xente acolledora e emprendedora, cun rico patrimonio natural, monumental e etnográfico, e cunha gastronomía que son testemuñas da súa historia e, ao mesmo tempo, elementos clave cos que deseñar o futuro”, un “gran potencial do que estamos convencidos na Deputación”, motivo polo que esta comarca “está tendo un peso específico na nosa xestión, sobre todo nestes últimos catro anos”.
Neste sentido, recalcou que a institución provincial está envorcando “importantes recursos económicos na Ulloa, dentro das posibilidades orzamentarias que ten a Deputación”, como demostra que neste mandato dedicou preto de 9M€ a “actuacións que melloran os servizos públicos e as infraestruturas de Palas de Rei, de Monterroso e de Antas de Ulla”.
Ademais, lembrou, a Deputación ten en marcha “un proxecto de referencia, xa non só a nivel provincial e galego, senón nacional, como é o Parque Central de Galicia. Un espazo público co que poñemos en valor o centro de xeográfico de Galicia, e que precisamente está dirixido a dinamizar o lecer dos veciños e a economía da comarca a través da promoción do territorio e do turismo”.
Agora, con este Plan de Sostibilidade Turística, “damos un paso máis, moi importante, co que reforzamos o compromiso que mantemos con esta comarca”, incidiu o Presidente.
En liña coa estratexia provincial
A candidatura aos fondos do Ministerio, explicou José Tomé, é froito así mesmo da “ampla estratexia” que a institución provincial ten marcada para potenciar o turismo como factor de desenvolvemento social e económico da provincia.
“Na Deputación traballamos para consolidar un modelo de turismo sostible e de calidade. Un turismo de experiencias, que coida o noso patrimonio e que deixa valor no territorio, tanto en termos económicos como de emprego”, asegurou o mandatario provincial.
Proxecto colectivo
O Plan de Sostibilidade Turística da Ulloa está impulsado pola Deputación, pero o obxectivo é que sexa un proxecto colectivo, tal e como resaltou o Presidente, quen, neste sentido, explicou que houbo unha ampla participación nas enquisas que se fixeron para elaborar as propostas do plan, e a resposta ás cartas de apoio solicitadas ós concellos e ao tecido asociativo para poder presentar a candidatura “foi excepcional”, algo que agradeceu de xeito expreso.
A necesidade do apoio da Xunta
A Deputación de Lugo acordou este mesmo venres na Xunta de Goberno solicitar o Plan de Sostibilidade Turística ao Ministerio de Industria, Comercio e Turismo. Unha vez presentado, será a Xunta de Galicia, ao igual que no caso do resto de comunidades autónomas, a que terá que valorar e apoiar esta candidatura para que salga proposta como preferente. “Esperamos contar co respaldo e coa colaboración da Administración autonómica para que o investimento de un millón e medio de euros que estamos solicitando poida ser unha realidade para esta comarca”, manifestou Tomé Roca.
Valorou o Presidente as moitas bazas a favor que ten a candidatura para saír elixida. Entre elas, destacou que a comarca “ten un enorme potencial e recursos no ámbito turístico”; que a proposta conta co apoio dos concellos e do tecido social, cultural e produtivo da zona; e que este é un plan “ambicioso, feito á medida da Ulloa, para atender as necesidades e aproveitar as oportunidades desta comarca”.
Actuacións do Plan de Sostibilidade Turística da Ulloa
O Plan contará cun paquete de medidas e actuacións que buscan enxalzar o destino turístico apostando polo benestar, o patrimonio e a gastronomía. Entre as accións, contémplase a creación de áreas de interpretación medioambientais, accións de sensibilización sobre os ecosistemas do territorio e a execución dun programa de plantación de árbores autóctonas en colaboración con diferentes entidades educativas, sociais, culturais, veciñais e medioambientais.
Tamén se inclúe a instalación de puntos de recarga de vehículos eléctricos; a creación e adecuación de camiños ciclables, peonís e sendeiros pola comarca tanto no Parque Central de Galicia como que leven a este espazo; actuacións de iluminación en monumentos; edición de material divulgativo e impulso da promoción por diferentes canais; aposta pola realización de experiencias en realidade aumentada ou a certificación de sostibilidade para establecementos de hostalería, ademais de formación en competencias dixitais ás persoas que traballen neste sector.
Recóllese a creación dunha oficina de turismo virtual, a aposta pola creación de experiencias turísticas de diferentes temáticas, ou a recuperación do patrimonio cultural para o seu uso turístico de San Salvador de Vilar de Donas, entre moitas outras iniciativas.
