Deputación de Lugo
Innovación e TIC

A Deputación de Lugo e o INCIBE habilitan en San Marcos un espazo para formar en ciberseguridade

Ciberseguridade
incibe
A Sala de Exposicións do Pazo provincial acollerá o luns e o martes, 4 e 5 de decembro, en horario de 9.00 a 14.00 e de 16.00 a 19.00, unha zona informativa e outra de actividades gratuítas enfocadas a mostrar á cidadanía a conter as ameazas de internet

A Deputación de Lugo e o Instituto Nacional de Ciberseguridade (INCIBE), dependente do Ministerio de Transformación Dixital, habilitarán un espazo no Pazo de San Marcos para informar e formar á cidadanía sobre como conter as ameazas de internet. En concreto, a Sala de Exposicións acollerá os vindeiros luns e martes, 4 e 5 de decembro, Experiencias itinerantes sobre ciberseguridade, que consistirá nunha zona informativa e outra de actividades gratuítas enfocadas a detectar os riscos e previr os problemas máis habituais en materia de ciberseguridade.

Entre os obxectivos desta iniciativa, dedicada á cidadanía en xeral, está o de reforzar a confianza no ámbito dixital a través da formación en materia de ciberseguridade, para mellorar a capacidade das persoas de desenvolverse con confianza na era dixital.

Este espazo contará con tres zonas diferenciadas: unha zona informativa, unha zona demostrativa e de capacitación, e unha zona de gamificación que contará con diferentes ordenadores. O público obxectivo é o alumnado, as familias, e as empresas, que poderán acceder ao espazo en horario de 9.00 a 14.00 e de 16.00 a 19.00. A zona demostrativa terá capacidade para 12 persoas ao mesmo tempo e a de gamificación para 24. A entrada é libre e gratuíta.