“As cegas de Ouselle” despediuse este sábado en Gundivós co apoio da Vicepresidencia da Deputación
A Vicepresidencia da Deputación de Lugo achegou este sábado a Gundivós o último concerto do ciclo “As Cegas de Ouselle”, que se despidiu tras percorrer Lugo, Samos e Bonxe. A deputada de Cultura Iria Castro participou nesta última xornada que serviu de encontro entre olería e música.
O forno da Reitoral de Gundivós acendeuse e serviu de punto de encontro para estas actividades que incluíron a actuación da agrupación tradicional de Aldara Palmeiro (violín e voz), Miguel Lustres (acordeón e voz) e Antón Castro (zanfona e voz), que interpretaron repertorios tocados e cantados polas coñecidas como cegas de Ouselle nas feiras de antano mentras as persoas asistentes viron como se remataban as pezas enfornadas o venres.
Esta xornada de portas abertas na Reitoral de Gundivós deu continuidade ás celebradas en semanas pasadas en Bonxe e Samos, que "serviron para visibilizar a diversidade da tradición oleira das comarcas de Lugo", destacou Iri Castro.
Así mesmo, recordou que este ciclo complementouse coa publicación do volume “Formas tradicionais da olería popular. Terra Cha. Bonxe”, coordinado por Hixinio Flores Rivas e Orlando Viveiro Veiga e editado polo Servizo de Publicacións da Vicepresidencia da Deputación de Lugo.
Esta actividade está incluída no marco da mostra “Conciencia dunha tradición: olaría de Mondoñedo, Bonxe, Samos e Gundivós” que se pode visitar no Vello Cárcere ata o 17 de maio.
