A Deputación adxudica por preto de 650.000€ obras en catro estradas clave para a mobilidade da provincia

A Xunta de Goberno da Deputación de Lugo aprobou este venres a adxudicación de obras por preto de 650.000€ para a mellora de catro en estradas provinciais ao seu paso polos concellos de Cospeito, Guntín, Friol, Palas de Rei, Paradela, O Saviñao e Castro de Rei. Así o anunciou a Voceira socialista do Goberno, Pilar García Porto, tras a reunión semanal celebrada no Pazo de San Marcos.

“Continuamos facendo un gran esforzo investidor para manter e mellorar a rede viaria provincial. Sempre dicimos que, con 4.217 quilómetros de lonxitude, temos a rede viaria provincial máis extensa de todas as Deputacións en España e tres veces maior ca da propia Xunta de Galicia en Lugo. Unha Xunta de Galicia que ten un Orzamento 115 veces superior ao que temos na Deputación de Lugo”, valorou García Porto, quen especificou que o Goberno autonómico conta con 13.257M€ fronte aos 116M€ do provincial.

Informou sobre as actuacións adxudicadas para as diferentes estradas durante a sesión semanal, detallando que en Cospeito, a Deputación adxudica á empresa Cholo SL por 242.326,71€ a rehabilitación dos seis primeiros quilómetros da LU-P-1701 que comunica Feira do Monte con Muimenta.

Un proxecto que consistirá na limpeza das marxes, drenaxe, estendido de aglomerado en quente e o pintado da vía. A empresa inclúe, entre as melloras, un aumento do prazo de garantía en 3 anos e reducir o prazo de execución dos traballos en mes e medio.

Ovisa Pavimentos e Obras SLU resultou adxudicataria, por 196.988€, da rehabilitación dun novo tramo, de tres quilómetros, da estrada provincial que une Lugo (polo Burgo) e Palas de Rei, a LU-P-2901. O proxecto afecta ao treito que vai desde o quilómetro 18,445 ao 21,370, ao seu paso polos concellos de Guntín, Friol e Palas e consiste na reapertura de cunetas, tarefas de limpeza e drenaxe, a pavimentación con aglomerado en quente e o pintado da vía con marcas reflexivas brancas e a sinalización vertical. 

O prazo de execución é de dous meses unha vez iniciadas as obras. A empresa inclúe entre as melloras 40 metros de cuneta revestida e o aumento do prazo de garantía en tres anos.

García Porto explicou que con esta nova actuación, a LU-P-2901 quedará “practicamente renovada na súa totalidade porque estes traballos dan continuidade ás melloras xa acometidas polo Goberno provincial, cun investimento de máis de un millón de euros”. E lembrou que nesta estrada a Deputación actuou recentemente entre os puntos quilométricos 3,340 e 5,400; entre os puntos 5,500 e 13,100; e entre os quilómetros 21,370 e o 25,000.

O terceiro proxecto que ten que ver coas estradas provinciais que adxudicou este venres a Xunta de Goberno é para mellorar a estrada provincial LU-P-4201, que dá servizo ós concellos de Paradela e O Saviñao. Concretamente, as obras afectan ó tramo que vai do quilómetro 8 ao 11,850 e a adxudicataria é a empresa Ogalia Contratas SL por 131.164€.

Os traballos consistirán no acondicionamento do firme, a reapertura de cunetas, e repavimentación de zonas degradadas. Ademais, a empresa inclúe melloras como o aumento do prazo de garantía en 3 anos e a redución dos tempos de execución en mes e medio, unha vez iniciadas as obras.

A Voceira socialista recordou que no mandato pasado, a Deputación xa investiu medio millón de euros para a mellora e renovación do pavimento de 12 quilómetros de estradas que unen Paradela e Currelos, no Saviñao. Esta mesma, a LU-P-4201 (en tres tramos); a LU-P-4205; e a LU-P-5818.

Adxudicados tamén os traballos de rehabilitación dun tramo de preto dun quilómetro do cinto comarcal, a LU-P-1611, á altura de Castro de Rei. En concreto, as obras afectarán ao treito que vai desde o punto quilométrico 93,665 e ata o 94,395. A empresa adxudicataria é Cholo SL e o orzamento é de 72.263,58€. As obras consistirán na mellora da drenaxe, fresado da vía, estendido do aglomerado en quente e reposición da sinalización. Neste caso a empresa tamén inclúe aumento do prazo de garantía en tres anos e a redución dos tempos de execución a mes e medio.

Pilar García Porto lembrou que nesta estrada, “fundamental para as comunicacións da provincia”, a Deputación vén de acometer obras de mellora por máis de 700.000€ noutro tramo ao seu paso por Friol, Outeiro de Rei e Begonte; acondicionando desde o punto quilométrico 49 ao 57. “Sempre reivindicamos que esta estrada ten características para ser de titularidade autonómica, polos concellos que conecta cos seus máis de 131 quilómetros de trazado”, valorou.

Aseos portátiles nos paseos de Ombreiro e Paradai

Adxudicado ademais o contrato de alugueiro de catro aseos portátiles que se instalarán no entorno dos paseos de Ombreiro e Paradai, no concello de Lugo. Incluíndo tamén a súa limpeza diaria, mantemento e a instalación de lavabos. 

A empresa adxudicataria é Recitor e Sanilu, SL, por un importe de 88.325,74€. “Unha dotación importante porque tanto o Paseo de Ombreiro como o de Paradai son moi transitados pola veciñanza e pertencen á Reserva da Biosfera Terras do Miño, que xestiona a Deputación”, explicou a Deputada, que valorou ademais que “por unha parte ofrecemos un servizo para os usuarios e usuarias e, por outra, melloramos a conservación e o mantemento destes espazos públicos”.

Granxa Gayoso Castro

A Xunta de Goberno aprobou tamén a adxudicación das prestacións de diversos servizos agrícolas e gandeiros para a Granxa Gayoso Castro por un importe de 125.961€ á empresa Isidro Hermanos Blanco Trigo, SL. García Porto explicou que se trata de servizos especializados, como a colleita de millo ou o empacado de herba, que precisan maquinaria especializada. O contrato terá unha duración dun ano coa posibilidade de prorrogalo de forma anual ata 3 veces, sen superar os catro anos.

Mazo de Santa Comba

Aprobada tamén a prórroga, por un ano máis, do acordo relativo á concesión demanial do Mazo de Santa Comba. Precisamente este venres vencía o prazo dos dous primeiros anos de vixencia do acordo ao que chegara a institución provincial co actual adxudicatario para a explotación deste ben provincial. Mediante este acordo, a concesión prolóngase ata xullo do 2025.