O Presidente e o Alcalde de Taboada reciben un novo camión de lixo financiado pola Deputación con 200.000€
O mandatario provincial subliñou o “importante esforzo da Deputación para cooperar cos concellos con medidas coma esta, e que poidan prestar así máis e mellores servizos aos seus veciños e veciñas”
O Presidente da Deputación de Lugo, José Tomé Roca, xunto co Alcalde de Taboada, Roi Rigueiro, supervisou a entrega dun novo camión de lixo ao Concello de Taboada, cunha dotación de 200.000€ financiada pola institución provincial. Este vehículo permitirá ao Concello reforzar a maquinaria do servizo de recollida de residuos, que atenderá ás 27 parroquias do municipio.
A adquisición deste camión compactador de residuos é un paso importante para a renovación e mellora dos equipos municipais, dado que a maquinaria anterior estaba obsoleta e suxeita a constantes avarías que dificultaban a eficiencia do servizo. O novo camión permitirá optimizar o funcionamento da recollida e reducir os custos derivados da reparación e do alugueiro de vehículos temporais.
O Presidente da Deputación destacou a importancia de colaborar cos concellos “para mellorar os servizos públicos que reciben os veciños e veciñas”. Subliñou que, a través de iniciativas como esta, a Deputación contribúe á mellora da calidade de vida, facendo posible que os concellos poidan acceder a recursos e medios para prestar uns servizos de maior calidade.
Pola súa banda, o Alcalde de Taboada, Roi Rigueiro, resaltou a relevancia desta axuda para o municipio, destacando que o novo camión supón unha mellora significativa na xestión de residuos e permitirá ao concello continuar coa renovación do parque móbil municipal, un dos compromisos máis importantes do seu mandato. O rexedor valorou “que esta inversión non só mellorará a eficiencia do servizo senón que tamén reducirá a carga económica derivada das avarías frecuentes dos equipos antigos”.
A Deputación de Lugo continúa demostrando o seu apoio aos concellos da provincia a través de investimentos como este, que melloran a calidade dos servizos públicos e favorecen a sustentabilidade e eficiencia nas localidades máis pequenas.
