A Deputación patrocina ao piloto lucense Xosé Alonso Liste no Campionato de Europa de Montaña, que arrincará o 12 de abril
A Deputación de Lugo reafirma un ano máis o apoio ao piloto lucense Xosé Alonso Liste, que conta co patrocinio de 3.000€ da institución provincial para a súa participación no Campionato de Europa de Montaña. A tempada da competición internacional arrincará o 12 de abril en Francia e finalizará o 21 de setembro en Croacia, cun total 11 probas programadas en 10 países.
O Deputado de Promoción Económica e Social, Pablo Rivera Capón, asistiu este xoves á presentación do novo vehículo co que participará nesta proba no CIFP As Mercedes, en Lugo. Rivera destacou a relevancia desta cita deportiva, que “permite a proxección internacional de Lugo e reúne aos mellores pilotos europeos nesta especialidade, polo que é unha grande oportunidade para visibilizar a nosa provincia en todo o mundo”. Resaltou tamén a Subida ao Fito, a única cita española do certame e unha das máis destacadas do campionato que se disputará os días 17 e 18 de maio en Asturias, e que atraerá a numerosos seguidores do mundo do motor.
