A Deputación clausura o torneo de oratoria no que competiron 200 estudantes
O Deputado de Promoción Económica e Social, PabloRivera Capón, participou este sábado na clausura do torneo de oratoria xuvenil +Lugo Debate, unha iniciativa na que participaron 200 estudantes e que contou cunha achega da Deputación de 10.000€. Durante a entrega de premios, o responsable provincial recoñeceu as horas de preparación, nervios, argumentos e “a valentía para expoñerse” dos participantes.
“Non deixedes nunca de debater”, animou Rivera Capón aos estudantes de Secundaria, Bacharelato e universitarios da provincia e de toda Galicia que competiron estes días no torneo e que encheron a mediodía o Salón de Actos da Delegación da Xunta de Galicia en Lugo. “Necesitamos máis espírito crítico, argumentación sólida e capacidade de diálogo. Iso amigas e amigos, é o que constrúe sociedades máis xustas e máis libres”.
PabloRivera entregou o premio ao campión de Discurso na categoría de bacharelato nun acto no que xunto ao Deputado participaron na clausura do torneo o presidente da asociación organizadora, Óscar Rodríguez de Vivero; a xornalista e presentadora do acto, Antía Montes, entre outras autoridades.
