O Presidente da Deputación supervisa o avance das obras do Parque Central e das vías de acceso
As actuacións do futuro centro xeográfico avanzan estes días cos remates do edificio multiusos, a construción do pórtico de entrada e o templete, e está completa a instalación da depuradora e da cometida eléctrica
José Tomé Roca: “Sabemos que este vai ser un polo turístico importante para o concello, a comarca da Ulloa e a provincia, e continuamos a traballar para cumprir co noso compromiso de poñelo a disposición dos veciños e veciñas canto antes”
O Presidente da Deputación de Lugo, José Tomé Roca, e a Alcaldesa de Antas de Ulla e Deputada de Réxime Interior, Promoción do Territorio e Turismo, Pilar García Porto, supervisaron o avance das obras do futuro Parque Central de Galicia e das vías de acceso que a institución provincial ten en marcha para facer realidade este complexo, cunha superficie aproximada de 20.000m2, situado en Nugallás, na parroquia ulloá de San Fiz de Amarante.
O mandatario provincial e a Alcaldesa, acompañados polos técnicos responsables da obra, anunciou que esta semana rematan os traballos de aglomerado en quente no firme da estrada LU-P-0301, que conecta a capitalidade de Antas de Ulla con Nugallás, entre o punto quilométrico 0,3 ao 3,6. Esta actuación, apuntou José Tomé Roca, que consistiu tamén no movemento de terras, a drenaxe mediante a colocación de tubaxes adecuadas e a limpeza de cunetas, “é de gran relevancia xa que soportará un alto volume de tráfico ao ser o acceso en ambas direccións tanto para os veciños e veciñas, e a vía que comunica coa provincia de Pontevedra por Rodeiro, como para os visitantes”.
Explicou ademais o Presidente que a maiores desta obra xa está moi avanzado o acondicionamento do camiño perimetral do futuro parque, o que suma entre estas dúas actuacións un investimento total de máis de 600.000€.
“Sabemos que este vai ser un polo turístico importante para o concello, a comarca da Ulloa e a provincia, e continuamos a traballar para cumprir co noso compromiso de poñelo a disposición dos veciños e veciñas canto antes”, valorou o Presidente.
Comprobaron durante a visita o avance doutras actuacións acometidas na parcela que a institución provincial está a acometer para poñer en valor o centro xeográfico de Galicia, e que avanzan estes días “a moi bo ritmo”, explicou Tomé Roca. “Estamos xa cos remates do edificio multiusos, a construción do pórtico de entrada e o templete, e está completa a instalación da depuradora e da cometida eléctrica”, subliñou.
Un espazo público no centro de Galicia
A empresa UTE Ovisa-Provisa é encargada de levar a cabo o proxecto, que inclúe un pórtico de entrada, unha praza e un monolito situado xusto nas coordenadas 7º 54’ 38,99” W 42º 45’ 25,15 N, que indican a posición exacta do punto medio da superficie da comunidade autónoma galega. Ademais, dun templete, o edificio multiusos, un parque infantil e fontes, contará con iluminación, sinalización e mobiliario urbano.
O edificio multiusos terá unha única planta e incluirá un porche de acceso, salón de actos, vestíbulo que servirá de recepción, dous aseos adaptados e un despacho. En canto ao templete será aberto con columnas de pedra que soportarán a cuberta. Ademais, na zona do monolito utilizarase pavimento continuo de cuarzo vermello terracota, e o monólito será de pedra natural.
Polo que respecta a explanada de xogos contará cuns 32 metros de longo e 19,60 metros de ancho, pensado para crear un espazo de ocio para as familias, escolares e o desenvolvemento de actividades. Entre os dous edificios, a zona de xogos e o monolito, haberá un camiño de acceso central e un sendeiro perimetral peonil. Contémplase ademais a instalación de dúas fontes que contarán con auga apta para o consumo humano, a iluminación do conxunto do complexo, sinalización e unha serie de mobiliario como papeleiras de madeira, bancos e mesas de pedra para poñer a disposición dos visitantes.
