O Presidente reafirma o apoio da Deputación ao Criterium Aeronáutico, que consolida a provincia como referente no mundo da aviación
“Cremos na cultura da innovación, no valor da divulgación científica e técnica, e tamén no potencial do noso territorio para acoller citas que combinan espectáculo, formación e oportunidades”, apuntou o mandatario provincial
A cita aeronáutica terá lugar no Aeródromo de Rozas do 25 ao 27 de xullo, e contará cunha programación que inclúe salto en paracaídas, voos de introdución ou exposicións aeronáuticas
O Presidente da Deputación de Lugo, José Tomé Roca,presentou este xoves na Sala de Xuntas a décimo sétima edición do Criterium Aeronáutico, que terá lugar a próxima fin de semana de xullo, do 25 ao 27, no Aeródromo de Rozas. Na presentación deste evento que, coincidirá coa celebración da XXXIX edición da Volta Aérea Galaico-Duriense, tamén participou o Presidente do Real Aeroclub de Lugo, Francisco Javier Abelleira Álvarez e a Tenente de Alcalde e Concelleira de Cohesión Territorial do Concello de Lugo, Ana González Abelleira, entre outras autoridades.
Na súa intervención, José Tomé destacou o compromiso da institución provincial que achega 10.000€ a un evento que "sitúa a provincia como referente no mundo da aviación deportiva e da divulgación científica". Subliñou que este apoio débese porque “cremos na cultura da innovación, no valor da divulgación científica e técnica, e tamén no potencial do noso territorio para acoller citas que combinan espectáculo, formación e oportunidades”.
O Presidente enmarcou a colaboración tamén na aposta da institución “por un modelo de territorio que aposta por actividades que dinamizan o rural, que xeran impacto positivo, que respectan o entorno e que deixan valor, tanto económico como social”.
O Critérium, organizado polo Real Aeroclub de Lugo, desenvolverase no Aeródromo de Rozas a vindeira fin de semana, converténdose nun punto de encontro para profesionais, afeccionados e familias, e nun escaparate das capacidades do territorio lucense para acoller eventos de calidade. A programación inclúe saltos en paracaídas, voos de introdución, exposición de medios aéreos e proxectos aeonáuticos do ciclo de Aeromecánica do CIFP As Mercedes, mostras de drons e de todo tipo de aeronaves ou exhibicións de pilotos profesionais, así como outras actividades.
“Esta cita é un exemplo de boa organización, de colaboración institucional e de visión de futuro”, indicou o Presidente, quen agradeceu a implicación de todas as persoas e entidades que fan posible esta iniciativa.
Pola súa banda, o Presidente do Real Aeroclub de Lugo agradeceu o apoio da Deputación e a súa convicción por esta cita que foi medrando ata o que é hoxe, “un espazo de encontro, aprendizaxe e divulgación ao redor da aviación, aberto a todo o mundo onde se fixan desde outros países”. Loou tamén o traballo do equipo organizador, dos profesionais participantes e das entidades colaboradoras, porque segundo afirmou, “sen o seu esforzo e compromiso non sería posible manter o alto nivel de calidade que caracteriza ao Critérium”. Rematou convidando á cidadanía a participar nas múltiples actividades que se desenvolverán ao longo destes tres días de celebración.
