A Deputación apoia a celebración do mercado Petiscos de Nadal organizada polos comerciantes de Taboada
García Porto: “Unha das principais liñas de actuación desta Deputación é o apoio ós sectores produtivos, sobre todo ós que son estratéxicos e contan cun gran potencial na nosa provincia, como son o primario e o de servizos”
A Deputación de Lugo apoia a celebración do mercado Petiscos de Nadal, organizada pola Asociación de Comerciantes e Industriais de Taboada o sábado 18 de decembro na praza de Riazón deste municipio da Ribeira Sacra. A Deputada de Réxime Interior, Promoción do Territorio e Turismo, Pilar García Porto, presentou este martes a iniciativa na Sala de Xuntas do Pazo de San Marcos xunto á presidenta da Asociación de Comerciantes taboadense, Tamara Castro.
Este mercado, que pretende promocionar e poñer en valor os produtos e a gastronomía da Ribeira Sacra con todo tipo de expositores artesanais, conta coa colaboración da institución provincial. Na presentación da iniciativa participaron ademais o Alcalde de Taboada, Ramiro Moure; o presidente da Federación de Comercio de Lugo, José María Seijas; Isabel Lozano, representante da empresa Vinissi, que xestiona o evento, e Antón Ledo, en representación da Vicepresidencia provincial.
García Porto destacou que “desde o inicio do mandato, unha das principais liñas de actuación desta Deputación é o apoio ós sectores produtivos, sobre todo ós que son estratéxicos e que contan cun gran potencial na nosa provincia, como son o primario e o de servizos”.
A Deputada explicou que a chegada da pandemia “fixo que reforzásemos aínda máis esta aposta impulsando diferentes medidas para a reactivación da economía da provincia” sacando adiante “accións específicas dirixidas a axudar ó comercio local, a hostalería e ó turismo, como sectores máis afectados pola crise”, pero tamén “colaboramos, como é este caso, co asociacionismo da provincia para que poidan desenvolver as súas propias iniciativas de dinamización”.
O programa
Entre os expositores haberá produtos artesanais gastronómicos de recoñecido prestixio, como as galletas Xiana, a cooperativa de produtos elaborados a partir de porco celta Tres Fuciños ou a empresa Ouro de Quiroga, que elabora o seu aceite con olivas de árbores autóctonas. Ademais, durante a xornada haberá actividades para toda a familia, como unha monocata con Arantxa Treus e Isabel Lozano, unha demostración da alfarería tradicional de Gundivós a cargo de Elías González, un obradoiro de repostería infantil, contacontos e o concerto de Airiños da Freba.
