Tres alumnas do Centro de Formación de Audiovisuais da Deputación fan prácticas na Gala dos Mestre Mateo
A experiencia serviralles para completar e enriquecer a formación coñecendo as dinámicas de traballo, a toma de decisións e a posta en escena para despois comparar cal é a percepción do espectador a través da televisión
A institución provincial defende un modelo de formación que posibilita as prácticas en
escenarios reais, nunha aposta decidida por unha formación pública de calidade e accesible a todos os mozos e mozas con vocación audiovisual
Tres alumnas do Centro de Formación do Servizo de Audiovisuais da Deputación de Lugo fan prácticas esta semana co equipo da Academia Galega do Audiovisual que se encarga da organización da Gala dos Mestre Mateo que se celebra este sábado en Expocoruña. Unha experiencia que lles servirá para completar a súa formación académica ao estar rodeadas de profesionais nun escenario real grazas a un acordo ao que a institución provincial chegou coa Academia.
Delas, dúas están matriculadas no ciclo superior de Produción e unha no de Realización. Esta formación serviralles para completar a súa etapa formativa ao observar e involucrarse na organización e coordinación dun evento desta envergadura. Estarán acompañadas en todo momento por persoal con responsabilidades para observar e aprender todas os pasos a seguir para que todo estea a punto para a celebración deste importante evento do audiovisual galego, así como aprender como se resolven imprevistos e como actuar na coordinación de grandes equipos.
O Deputado de Promoción Económica e Social, Pablo Rivera, destaca a importancia desta colaboración coa Academia Galega do Audiovisual para completar e enriquecer a formación destas tres alumnas ao permitirlles estar ao carón de profesionais de primeiro nivel cunha ampla experiencia nun evento coma este. Ademais, salienta que será relevante para elas apreciar as dinámicas de traballo, a organización, observar a toma de decisións e ver a posta en escena in situ para despois compara cal é a percepción do espectador a través da televisión.
A institución provincial defende un modelo de formación que posibilita as prácticas en
escenarios reais, nunha aposta decidida por unha formación pública de calidade e accesible a todos os mozos e mozas con vocación audiovisual, independentemente da situación económica das súas familias. Neste sentido, a Deputación involucra ao alumnado na organización e a retransmisión de actos por streaming como parte do seu programa académico.
20 aniversario
Os XX Premios Mestre Mateo, que recoñecen a excelencia do último ano das producións audiovisuais galegas, chegan este ano cunha edición de aniversario dos vinte anos de andaina do certame. Este sábado 19 de marzo celebrarase a gala de entrega de premios onde se darán a coñecer as gañadoras e gañadores deste ano.
A celebración terá lugar nun novo recinto: Expocoruña. Neste espazo estrearase un novo formato para a cerimonia, cos finalistas das distintas categorías sentados en mesas ao redor dun escenario, cun formato similar ao doutras populares entregas de premios como os Globos de Ouro ou os Premios Feroz, segundo informan dende a Academia Galega do Audiovisual.
