A Deputación licita por case 1M€ a dotación de equipamento e as prestacións básicas para abrir este ano a residencia de Ribas de Sil

A Deputación de Lugo deu este venres dous pasos determinantes para poder cumprir coa previsión de abrir este ano o Centro de Atención a Maiores de Ribas de Sil. Trátase da licitación, por un importe conxunto de case 1M€, dos contratos para a dotación de equipamento da residencia, que sae a contratación por 332.000€, e para a prestación dos servizos básicos, cun orzamento de 610.000€. 

Así o anunciou a voceira socialista do Goberno provincial, quen explicou que o contrato de equipamento se divide en cinco lotes: mobiliario xeral; equipos médicos e axudas técnicas; lavandería; cociña; e cortinaxe. O prazo de entrega do material, unha vez asinado o contrato, será de dous meses. 

No caso das prestacións básicas, o período de vixencia do contrato irá dende o vindeiro mes de setembro ata xuño do 2023, coa opción de tres prórrogas anuais.

“Son dous pasos determinantes para poder poñer en funcionamento a residencia de Ribas de Sil”, apuntou García Porto, que engadiu que no que respecta á rede de centros públicos de atención a maiores da Deputación, na Xunta de Goberno deste venres tamén quedou aprobada a licitación do contrato para a prestación de servizos básicos na residencia de Meira por un importe de preto de 710.000€. “Neste caso, o que facemos agora é sacar a licitación un novo contrato para as prestacións básicas, tendo en conta que remata o que está en vigor”, sinalou a voceira.

Por outra banda, a Xunta de Goberno sacou adiante a adxudicación por un importe de 6.000€ do contrato para a prestación do servizo de mantemento integral dos elevadores e das portas automáticas das residencias de Trabada, Pol, A Fonsagrada, Castroverde, Pedrafita do Cebreiro e Meira, xa en funcionamento, e de Navia de Suarna e Ribas de Sil, coa previsión de abrir este ano. A adxudicataria é a empresa Schindler SA e o período do contrato é de un ano, coa posibilidade de tres prórrogas máis.

Relacionado coas residencias de maiores da Deputación, a Xunta de Goberno tamén adxudicou por importe de 120.000€ e unha duración dun ano, prorrogable por outro, o contrato de subministración de gasóleo para a calefacción do Centro de Atención a Maiores de Navia de Suarna, que polas características das instalacións non ten sistema de gas propano, e doutros inmobles provinciais, como son o Museo Provincial, o edificio Miño -que alberga o Arquivo e a Unidade de Mantemento-, a Granxa Gayoso Castro e o Museo do Pazo de Tor.

 Reto demográfico

A Xunta de Goberno aprobou concorrer a una nova liña de axudas de fondos europeos, neste caso convocada polo Ministerio para a Transición Ecolóxica e o Reto Demográfico, para o financiamento de proxectos innovadores impulsados por entidades locais que teñan como obxectivo a transformación territorial, a reactivación da actividade socioeconómica e a loita contra o despoboamento. 

A voceira provincial socialista explicou que a Deputación presentará unha solicitude de medio millón de euros a esta convocatoria para desenvolver un proxecto de carácter demostrativo, que consistirá na creación de tres oficinas técnicas noutros tres puntos distintos da provincia, “dende as que se prestará asesoramento gratuíto e soporte a proxectos tractores que reactiven a actividade socioeconómica e que fomenten a creación e o desenvolvemento de ecosistemas de intelixencia e innovación territorial”.

“En cooperación cos respectivos concellos, as oficinas servirán como punto de apoio local para a atracción de novos veciños e veciñas, e servirán tamén de acollida e integración da poboación migrante, e para impulsar actuacións dirixidas ao desenvolvemento económico endóxeno”, detallou a Deputada.

No caso de que a Deputación resulte beneficiaria destes fondos europeos, terá que cofinanciar o proxecto cunha aportación que non superará os 55.000€.

Cooperación cos concellos

Este venres, a Xunta de Goberno acordou a sinatura de dous convenios de colaboración cos concellos de Foz e Samos “para que poidan ofrecer máis e mellores servizos aos seus veciños e veciñas”, sinalou a voceira socialista do Goberno.

No caso de Foz, a Deputación destina 543.699,46€ para a humanización das rúas Eduardo Pondal, Salvador de Madariaga, Irmandiños, Curros Enríquez e a Praza de Galicia, unhas arterias de comunicación importantes para esta vila mariñana. O Concello achegará máis de 224.000€ para materializar este convenio, que, desta forma, ten un importe total de 767.720€.

Polo que respecta a Samos, a institución provincial aportará ao Concello 205.730€ para acometer a mellora dos accesos aos núcleos de Lastres, Bustofrío, Gosende e Outonín; para renovar a pavimentación da vía que conecta A Veiga e Sivil e do camiño de Lulle a San Román; e para a renovación do abastecemento de auga en Vilaceite e Lamartín.

Seguros

Por outra banda, a Xunta de Goberno provincial deu o visto bo á licitación dos servizos de mediación e asesoramento en materia de aseguramento da Deputación de Lugo. Trátase dun servizo de asistencia técnica especializada en materia de aseguramento para a identificación e análise dos seus riscos, elaboración dos pregos dos seguros para contratar, posta en marcha de coberturas ou a xestión de seguros que requira a institución.

Este contrato non terá custo para a Deputación, porque o adxudicatario será retribuído polas entidades aseguradoras coas que se contraten as correspondentes pólizas, de acordo co uso e práctica do mercado e coa lexislación aplicable. A duración deste contrato será de dous anos, coa posibilidade de prorrogalo por dous máis.

Remanentes do Plan Único para Cervo

Outro dos asuntos que saíu adiante foi a solicitude do Concello de Cervo para destinar remanentes do Plan Único 2021 a novas actuacións, en concreto, a cantidade de 27.300€ para a renovación da rede de abastecemento nos núcleos de Alleira e O Cal.

Ampliación do prazo dos Premios de Turismo

A Xunta de Goberno aprobou a ampliación do prazo -dende o 15 ao 30 de xuño- para a presentación de candidaturas aos premios Lugo Cambia ó Turismo Lucense; E Para Comer Lugo á Gastronomía Lucense; e Premio Turismo Sostible.