A Deputación de Lugo, modelo de custodia do territorio nun foro sobre esta temática en Tenerife
![](/sites/deputacionlugo.org/files/2022-10/IMG-20221005-WA0066.jpg)
O organismo provincial ten en marcha dende o ano 2014 un proxecto innovador para dinamizar as zonas de alto valor ecolóxico e social da provincia como son as Insuas do Miño e Ollos de Begonte
A Deputación de Lugo presentou este mércores o seu modelo de custodia do territorio nunhas xornadas que se celebran esta semana en La Laguna organizados polo Cabido de Tenerife baixo o título Jornadas sobre Herramientas Jurídicas para la Custodia del Territorio. Marcos jurídicos disponibles y experiencias aplicadas. Estes encontros, nos que a institución provincial participou de xeito telemático, contou coa presenza de representantes de diferentes administracións, persoal técnico e partes implicadas na articulación dos acordos para o mantemento e posta en valor de territorio protexidos, interesadas en garantir a viabilidade destes tipo de colaboracións.
No foro, o xefe de servizo de Medio Ambiente da Deputación, Luis Reija, explicou o proxecto innovador que a institución provincial ten en marcha dende o ano 2014 nas Insuas do Miño (situadas en Rábade e Outeiro de Rei) e Ollos de Begonte, ambos territorios propiedade da Deputación. A institución promove este acordo como xestora da Reserva da Biosfera Terras do Miño. O obxectivo é mellorar o estado de conservación da flora, fauna e hábitats presentes nas zonas; o mantemento de labores agrícolas e gandeiras tradicionais, ademais de divulgar os valores naturais do entorno mediante visitas organizadas e campañas informativas e de mellorar o estado de conservación e de seguridade dos espazos públicos.
A Deputación aporta 25.000€ anuais para levar a cabo estes traballos e a entidade de custodia realiza o traballo que os terreos necesitan, ademais de actividades de divulgación para todos os colexios da provincia de Lugo ou visitas á zona. A institución conta cun Centro de Interpretación no que se levan a cabo diferentes obradoiros, investigacións, inventarios ou citas sobre novas especies autóctonas. Con esta iniciativa a Deputación conseguiu dinamizar un lugar que estaba practicamente abandonado e crear unha imaxe favorable da zona.