A Deputación aporta 130.000€ ao Concello de Guitiriz para crear unha senda peonil na rúa Manuel María
“Trátase dunha actuación realmente importante, porque esta rúa dá acceso a varias casas, pero tamén conecta o centro da vila co Centro de Saúde e co instituto, polo que ten moito tránsito”, destacou o mandatario provincial
Esta aportación económica, explicou José Tomé, enmárcase no compromiso da institución de cooperar cos concellos para que poidan prestar unha mellor atención aos seus veciños, e “pon de manifesto que a día de hoxe somos unha Administración esencial para achegar os servizos públicos á xente”
O Presidente da Deputación de Lugo, José Tomé Roca, asinou este venres xunto coa Alcaldesa de Guitiriz, Marisol Morandeira Morandeira, un convenio de colaboración a través do que a institución provincial aporta ao Concello 130.000 euros para mellorar a seguridade e a accesibilidade da rúa Manuel María coa creación dunha senda peonil.
Esta vía conecta o centro da vila con servizos básicos como o Centro de Saúde e o instituto. A achega da Deputación representa máis do 98% do investimento necesario para sacar adiante esta actuación, á que o Concello dedica 2.000€, polo que o importe total ascende a 132.000€.
O acto de sinatura do convenio celebrouse na propia rúa Manuel María, coa presenza do Deputado de Promoción Económica e Social, Pablo Rivera Capón, concelleiros e concelleiras da Corporación municipal e tamén veciños e veciñas do municipio.
José Tomé subliñou que se trata “dunha actuación realmente importante” porque esta rúa non conta a día de hoxe cun espazo específico para o paso dos viandantes, e ten moito tránsito, xa que dá servizo a vivendas e comunica co ambulatorio e o instituto. Polo tanto, o paseo peonil “redundará na mellora da seguridade e da comodidade dos veciños e veciñas”.
Puxo en valor o Presidente a axilidade coa que traballa a Deputación de Lugo, sinalando que “hai xusto unha semana acordamos na Xunta de Goberno colaborar con Guitiriz para facer un paseo peonil nesta rúa Manuel María, e hoxe estamos aquí asinando o convenio que fará realidade esta colaboración”. Agora o Concello xa pode licitar as obras de inmediato.
Durante o acto, o Presidente felicitou tamén a Alcaldesa por este proxecto, que demostra, dixo, a súa “preocupación e o teu traballo constante polos veciños. Un excelente traballo que estou convencido de que che recoñecerán”.
Preto de 4,5M€ da Deputación en Guitiriz
O Presidente enmarcou esta iniciativa na “cooperación, intensa e continua, que mantemos co Concello de Guitiriz e que, en cifras, tradúcese en case 4,5M€ só no que vai deste mandato”. Unha cantidade que segundo explicou Tomé Roca “demostra claramente o compromiso que temos co Concello, coa Alcaldesa e cos veciños e veciñas de Guitiriz”, pero tamén “pon de manifesto que, a día de hoxe, somos unha Administración esencial para achegar os servizos públicos á xente, especialmente ante os recortes que vén aplicando a Xunta de Galicia”.
“Sempre digo que a Deputación é o Concello dos Concellos, e nesa liña vamos a seguir: traballando e colaborando con todos os concellos da provincia na medida das posibilidades da institución, sen mirar cores políticas, senón sempre ao servizo da xente”, recalcou o mandatario provincial.
