A Vicepresidencia da Deputación distribuirá entre os clubs de baloncesto a publicación “Líderes anotadores” sobre a historia do CB Breogán
A Vicepresidencia da Deputación de Lugo distribuirá a clubs de baloncesto exemplares da publicación “Líderes anotadores”, que repasa a traxectoria dos cinco xogadores que, ao longo da historia do CB Breogán, lograron ser os máximos anotadores da primeira categoría do baloncesto español coa camiseta celeste.
O deputado de Deportes Efrén Castro explicou que “coa distribución aos clubs, pretendemos que a publicación chegue, sobre todo, ás rapazas e rapaces que xogan e desfrutan co baloncesto. Estamos seguros que é un contido que lles gustará porque recolle unha parte da historia do CB Breogán, e valoramos especialmente que sexa en galego e que contribúa, polo tanto, a vincular o noso idioma coas afeccións e os intereses da mocidade”.
A publicación, promovida pola Fundación Breogán co apoio da Vicepresidencia da Deputación de Lugo, recolle textos dos xornalistas Luís Timiraos, Ovidio González, Roberto Prado e Óscar Losada – tamén responsable da edición-, con curiosidades e datos que trazan os perfís e os méritos deportivos de Alfredo Pérez, Bob Fullarton, Velimir Perasovic, Charlie Bell e Dzanan Musa.
