O Museo Provincial de Lugo acollerá o curso "Tempo de Arte. Obras de Museo", un percorrido polas pezas da institución da man do Grupo de Investigación Iacobus
![](/sites/deputacionlugo.org/files/2024-04/IMG_4588.jpg)
As persoas interesadas en participar teñen que anotarse no enderezo electrónico tiempodearte2024@gmail.com
O Museo Provincial de Lugo acollerá os vindeiros 21 e 23 de maio o curso “Tempo de Arte. Obras de Museo”, organizado polo Grupo de Investigación Iacobus da USC coa colaboración da Vicepresidencia da Deputación de Lugo.
O curso, coordinado polas investigadoras e profesoras de Historia Miriam Elena Cortés e Patricia Cupeiro e pola directora do Museo Aurelia Balseiro, inclúe un programa de conferencias nas que as investigadoras e investigadores do grupo analizarán varias obras do Museo Provincial de Lugo.As pezas seleccionadas reflicten a diversidade de intereses, campos de traballo e liñas de investigación que abarca o Grupo Iacobus e abranguen diferentes periodos históricos, estilos e artistas.
Destaca a conferencia inaugural de José Manuel García Iglesias sobre Francisco Asorey, homenaxeado este ano pola Real Academia de Belas Artes dedicándolle o Día das Artes Galegas, na que falará sobre a obra “Cristo Redentor”, entre outras pezas máis coñecidas. Ou a ponencia de Mónica Rey, que falará sobre a obra “Retrato de Rosa Piño”, de Julia Minguillón, unha das últimas incorporacións do Museo Provincial e Lugo.
O programa inclúe tamén visitas ás pezas tratadas nas conferencias, co acompañamento das persoas relatoras, que terán lugar cada xornada ás 17.20 horas.
A deputada de Cultura Iria Castro e a directora do Museo Provincial de Lugo Aurelia Balseiro agradeceron a iniciativa do grupo investigador, que contribúe a poñer en valor as pezas do Museo e subliña a importancia da investigación e da divulgación científica no ámbito dos museos.
![Programa](/sites/deputacionlugo.org/files/inline-images/Programa%20%282%29_page-0001.jpg)
Inscricións
As persoas interesadas en participar nas xornadas, gratuítas, deben inscribirse a través do enderezo electrónico tiempodearte2024@gmail.com. Ofrécense 50 prazas.
Monográficos Iacobus
A actividade forma parte do ciclo Monográficos Iacobus, promovido polo Grupo de Investigación Iacobus, que pretende contribuír á difusión de pezas destacadas dos museos galegos e que tivo o seu punto de partida na Fundación Museo Catedral en Compostela con grande éxito de convocatoria.