A Vicepresidencia organizou unha ruta ciclista para promocionar o paso por Sarria da volta profesional Gran Camiño
Efrén Castro sinalou que "a rolda galega suporá unha oportunidade única para proxectar Sarria como punto de referencia do Camiño de Santiago"
Sarria iniciou a conta atrás para O Gran Camiño cunha ruta ciclista polo trazado da cuarta etapa da volta
profesional a Galiza, que se disputará o vindeiro 27 de febreiro.
Un grupo de ciclistas de DHG Team, Club Ciclista Cidade de Lugo e Triatlón Cidade de Lugo Fluvial participaron na iniciativa, promovida pola Vicepresidenta da Deputación de Lugo, que patrocina o paso da proba por Sarria.
O deputado de Deportes, Efrén Castro, e o ex-ciclista profesional Ezequiel Mosquera, impulsor de O Gran Camiño, sumáronse ao grupo, que percorreu o trazado previsto para a contrarreloxo que decidirá a proba.
Trátase de 15,8 quilómetros con saída do casco urbano de Sarria, con tramos nas estradas LU-P-5707 e LU-P-5602,, coincidindo co trazado do Camiño de Santiago, e volta á vila para alcanzar a meta, situada na Rúa do Castelo, na cima do casco histórico, fronte as icónicas letras de Sarria.
O deputado de Deportes Efrén Castro explicou que "O Gran Camiño suporá unha oportunidade única para proxectar Sarria para como punto de referencia do Camiño de Santiago, incluso a nivel internacional, porque a proba traerá aquí algúns dos mellores equipos profesionais do mundo"
O responsábel provincial agradeceu "a participación dos clubs na ruta, coa que buscamos tamén que o mundo do ciclismo afeccionado e de base se sinta partícipe deste gran evento deportivo e se achegue o día 27 a Sarria".
A Vicepresidencia da Deputación de Lugo patrocina o paso por Sarria do Gran Camiño, que se celebrará do 24 ao 27 de febreiro e que pretende recuperar un espazo propio para o ciclismo galego no calendario
internacional. A localidade sarriá acollerá, o día 27, a cuarta etapa desta volta a Galiza, unha contrarreloxo que se prevé decisiva para o desenlace da rolda.
Antes, o pelotón internacional realizará outras tres etapas, polas provincias de Pontevedra, A Coruña e Ourense. A organización confirmou a participación na proba de equipos como o Movistar, Cofidis,
Euskaltel-Euskadi, Start Up Nation, Education First ou Tavira.
